U biełaruskich turmach usio jašče zabaraniajuć karystacca łyžkami? 3

Takuju vysnovu možna zrabić ź pierapiski palitviaźnia Źmitra Daškieviča i Departamienta vykanańnia pakarańniaŭ.

Nahadajem, niekalki miesiacaŭ nazad Daškievič napisaŭ pra prynižeńni, ź jakimi vymušany sutykacca viaźni štodnia — u pryvatnaści, u turmach nie dazvalajuć karystacca zvyčajnymi łyžkami, akramia pryjomaŭ ježy pa raskładzie. A heta značycca, što viaźni nie mohuć ni raźmiašać cukar u harbacie, ni źjeści ŭłasnaj ježy z «pieradačak», a vymušanyja rabić heta futlaram ad zubnoj ščotki. Źmicier Daškievič pisaŭ skarhu ŭ DVP z prośbaju pravieryć zakonnaść hetahaha vyčvarenskaha praviła. Jak vynikaje z adkazu DVP, takoje praviła jość, ale pradstaŭniki MUS nie paznačyli, jaki dakumient praduhledžvaje takuju normu, tamu ŭźnikaje pytańnie, ci sapraŭdy hety dakumient isnuje.

Poŭny tekst zvarotnaha lista Źmitra Daškieviča da MUS:

U adpaviednaści z art. 21 Kanstytucyi Respubliki Biełaruś dziaržava harantuje pravy i svabody hramadzian Biełarusi, zamacavanyja ŭ Kanstytucyi, zakonach i praduhledžanyja mižnarodnymi abaviazacielstvami dziaržavy. Zhodna z art. 25 Kanstytucyi Respubliki Biełaruś (artykuł 8 Mižnarodnaha Pakta AAN «Ab hramadzianskich i palityčnych pravach») nichto nie pavinien padviarhacca katavańniam, žorstkamu, biesčałaviečnamu abo źnievažalnamu jaho hodnaść zvarotu. Artykuł 40 Kanstytucyi Respubliki Biełaruś nakładaje abaviazalnictvy na dziaržaŭnyja orhany, słužbovyja asoby razhledzieć luby zvarot i dać adkaz va ŭstanoŭleny zakonam termin. Artykuł 62 Kanstytucyi Respubliki Biełaruś daje mnie prava na jurydyčnuju dapamohu dla ažyćciaŭleńnia i abarony pravoŭ i svabodaŭ, u tym liku prava karystacca ŭ luby momant dapamohaj advakata. P.p. 55.8 Praviłaŭ unutranaha rasparadku papraŭčych ustanoŭ daje mnie taksama prava źviartacca z prapanovami, zajavami i skarhami nie tolki da administracyi papraŭčaj ustanovy, ale i ŭ vyšejstajačyja orhany kryminalna-vykanaŭčaj sistemy, sud, orhany prakuratury, orhany dziaržaŭnaj ułady i kiravańnia. U adpaviednaści z art. 10 Mižnarodnaha Paktu «Ab hramadzianskich i palityčnych pravach» ŭsie asoby, pazbaŭlenyja voli, majuć prava na humannaje abychodžańnie i pavahu hodnaści, jakaja ŭłaściva čałaviečaj asobie. Pavodle p.p. 52.5 Praviłaŭ unutranaha rasparadku śledčych izalataraŭ kryminalna-vykanaŭčaj sistemy ministerstva ŭnutranych spraŭ Respubliki Biełaruś № 3 ad 13.01.2004 h. (u red. Pastanovy MUS 10.03.2010 h. № 54) asoby, jakija ŭtrymlivajucca pad vartaj na pieryjad utrymańnia ŭ SIZA zabiaśpiečvajucca dla indyvidualnaha karystańnia stałovaj posudam i stałovymi pryborami (miska, kubak, łyžka).

Dziakuju vam za adkaz (za 28.12.2012 № -29/D-3297) na moj papiaredni zvarot. Chacia tłumačeńni vašyja pakinuli jašče bolš pytańniaŭ.

Pa-pieršaje, niezrazumieła na jaki dakumant vy spasyłajeciesia, havoračy pra toje, što «u adpaviednaści z patrabavańniami viedamasnych narmatyŭnych pravavych aktaŭ /…/ asoby, jakija ŭtrymlivajucca ŭ śledčych izalatarach i turmach, dla pastajannaha karystańnia zabiaśpiečvajucca aluminievymi kubkami. Miski i łyžki vydajucca tolki na čas pryjomu ježy,« — što heta za akt taki?

Pa-druhoje, kali možna (akazvajecca, možna taki!) dazvolić dla pastajannaha karystańnia kubak, dyk čamu nielha dazvolić dla pastajannaha karystańnia łyžku? Kaniešnie, ja razumieju, što vy pakul, nie dumajecie, što paŭstaniecie kali-niebudź pierad sudom čałaviečym (dy tolki tak budzie — pačynajcie navat «svaje» padručniki pa historyi!), ale ž pierad sudom Božym stajaćmiecie. I niaŭžo nie budzie soramna vam za toje, što vy ździekvalisia (inšych słovaŭ tut nie znajści) ź ludziej, prymušajučy ich zamiesta łyžak karystacca futlarami ad zubnych ščotak?

Pa-treciaje, byli ž navat u DVP MUS RB niekatoryja ludzi pry rozumie, katoryja prydumali Dadatak 3 da Praviłaŭ unutranaha raskłada papraŭčych ustanovaŭ (ad 20.10.2000 № 174), u jakim ad redakcyi 05.11.2008 h. № 321 u punkcie 10 pišacie, što asudžany moža mieć pry siabie: «kubak, łyžku (aluminievyja, płastmasavyja, draŭlanyja)». Dyk što, znajšlisia tak chutka sadysty, što ŭ duchu humanaści pa-biełarusku łyžki zabaranili? Što ž, u našym carstvie-haspadarstvie moža być usio. Tady, taksama, kali łaska, paviedamcie mnie numar adpaviednaha narmatyŭnaha dy jašče i «pravavoha» (jak vy nastojvajecie) dakumanta.

Majučy niemały dośvied biessensoŭnaje pierapiski z Departamientam vykanańnia pakarańniaŭ, hłupych iluzijaŭ ŭ mažlivaści znajści praŭdu (u niedrach karnych strukturaŭ MUS RB) nie vynošvaju. Tamu pakidaju za saboju prava źviartacca ŭ mižnarodnyja arhanizacyi, u tym liku ŭ Kamitet pa pravach čałavieka AAN, kab chacia b mižnarodnaja supolnaść asudziła katavańni ŭ «papraŭčych» (jaki ździek sa słova!) ustanovach DVP MUS RB.

0

0

0

0

0

0

Pavodle mfront.net

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH