Dakumienty ab stvareńni i raźvićci Jeŭrazijskaha ekanamičnaha sajuza pavinny być padadzieny prezidentam Biełarusi, Kazachstana i Rasii da 1 maja 2014 hoda. Sam sajuz budzie zapuščany 1 studzienia 2015 hoda, paviedamiŭ prezident Kazachstana Nursułtan Nazarbajeŭ 29 maja ŭ Astanie na bryfinhu pavodle vynikaŭ pasiadžeńnia Vyšejšaha jeŭrazijskaha ekanamičnaha savieta.
«Siońnia na pasiadžeńni Vyšejšaha jeŭrazijskaha ekanamičnaha savieta my abmierkavali najbolš aktualnyja pytańni, pierśpiektyvy dalejšaha raźvićcia Mytnaha sajuza, Adzinaj ekanamičnaj prastory. Taksama byŭ razhledžany chod pracy pa stvareńni JEES. Heta było pieršaje naša pasiadžeńnie za apošni čas, na jakim vyrašalisia kankretnyja pytańni. Najpierš chočacca adznačyć pryniatyja rašeńni pa realizacyi asnoŭnych kirunkaŭ intehracyi», — cytuje Nazarbajeva infarmahienctva Kazinform.
Udzielniki sustrečy, pavodle jaho słoŭ, damovilisia ab paetapnym praviadzieńni intehracyi. «Zaraz hałoŭnaj metaj źjaŭlajecca ŭstaranieńnie ŭsich niedachopaŭ Mytnaha sajuza i kančatkovaje farmiravańnie AEP. Na asnovie hetaj pracy my prymiem rašeńnie ab dalejšym pahłybleńni intehracyjnych pracesaŭ. Chacieŭ by padkreślić, što razmova idzie pra całkam ekanamičnuju intehracyju, jakaja hruntujecca na prahmatyźmie i ŭzajemnaj vyhadzie dla ŭsich dziaržaŭ», — skazaŭ Nazarbajeŭ.
Jon taksama paviedamiŭ, što nastupnyja pasiadžeńni Vyšejšaha jeŭrazijskaha ekanamičnaha savieta projduć u kastryčniku ŭ Minsku i ŭ śniežni ŭ Maskvie.
«My majem namier praciahnuć metanakiravanuju ŭzvažanuju palityku intehracyjnych pracesaŭ u miežach Mytnaha sajuza», — padkreśliŭ prezident Kazachstana.
