Na padrychtoŭku i prasoŭvańnie Aleny Łanskoj, jakaja pradstaŭlała Biełaruś na "Jeŭrabačańni-2013", było patračana kala 264 tysiač jeŭra. Ab hetym BiełaPAN paviedamiŭ pradziusar śpiavački Dźmitryj Baranaŭ.
"My praviali reviziju i ŭbačyli, što padrychtoŭka Aleny da konkursu — heta nie samy zatratny ŭdzieł Biełarusi ŭ "Jeŭrabačańni" ŭ paraŭnańni z udzielnikami minułych hadoŭ. Na prasoŭvańnie samoj artystki spatrebiłasia kala 154 tysiač jeŭra, usiaho sioleta my zatracili kala 264 tysiač jeŭra", — skazaŭ Baranaŭ.
"My dziakujem našym sponsaram za toje, što jany nam dapamahli sioleta i nam udałosia padrychtavać artystku i atrymać toj vynik, jaki my atrymali", — dadaŭ pradziusar.
Nahadajem, sioleta zhodna z pałažeńniem ab praviadzieńni nacyjanalnaha adboračnaha tura na "Jeŭrabačańnie-2013" usie raschody, źviazanyja z udziełam vykanaŭcaŭ u prajekcie i konkursie (stvareńnie fanahramy i aranžyroŭki, pastanoŭka numaru, padrychtoŭka sceničnych kaściumaŭ), apłačvalisia samimi vykanaŭcami abo ich pradziusarami.
U toj ža čas u dakumiencie adznačałasia: kali kiraŭnictvu Biełteleradyjokampanii padabajecca vykanaŭca, jana moža zaniacca jaho pradziusavańniem.
U vyniku ŭ sponsarach Łanskoj značylisia navapołacki biźniesmien Mikałaj Varabiej — kiraŭnik kampanii "Interservis", jakaja zajmajecca aptovymi pastaŭkami nafty na pierapracoŭku i prodažam naftapraduktaŭ na biełaruskim i mižnarodnym rynkach, a taksama Alaksandr Šakucin — staršynia savieta dyrektaraŭ AAT "Amkador", znamieśnik hiendyrektara ZAT "Prammiedinviest", uładalnik pryvatnaha pradpryjemstva "Spamaš", hrupy kampanij "PMI-hrup".
Pieršapačatkova pradziusar śpiavački paviedamlaŭ BiełaPAN, što na padrychtoŭku Łanskoj da konkursu sponsary pieraličyli dva tranšy pa 2 młrd. rubloŭ (2 młrd. rubloŭ — kala 230 tys. dołaraŭ), ź jakich tolki na proma-pradukcyju dla "Jeŭrabačańnia-2013" było patračana 250 tysiač dołaraŭ.
Choć, pavodle słoŭ Baranava, kab nablizicca da vyniku pieršaj piaciorki na "Jeŭrabačańni", patrebny kudy bolšyja srodki — nie mienš čym 2 miljony jeŭra. "Zychodziačy sa źviestak, jakija nazyvali krainy, što ŭvajšli ŭ top-5 sioleta, mahu skazać, što dla taho, kab atrymać dastojny vynik i nablizicca da hetaj piaciorki, treba nie mienš čym 2 miljony jeŭra", — adznačyŭ pradziusar.
U toj ža čas, ličyć jon, pramoj zaležnaści pamiž sumaj układzienych srodkaŭ i vynikam artysta na "Jeŭrabačańni" niama. "Tamu što tut isnuje dastatkova šmat uskosnych faktaraŭ. I naohuł, układańnie hrošaj u śfieru mastactva — zaŭsiody peŭnaja ryzyka", — padkreśliŭ Baranaŭ.
Tamu, adznačyŭ jon, i ŭźnikaje dylema: "Nie viedaju, jak pravilna pavinna być pastrojena sistema padrychtoŭki artysta: ci pavinny heta być dziaržaŭnyja hrošy, pryvatnyja hrošy, ci patrebny sponsary… Bolš pravilnym, chutčej za ŭsio, budzie varyjant dziaržaŭna-pryvatnaha partniorstva i supracoŭnictva. Viedaju adno — kali jość pieśnia i talenavity vykanaŭca, a srodkaŭ na jaho prasoŭvańnie i padrychtoŭku niama, heta, kaniešnie ž, kiepska".
Na pytańnie, ci budzie ŭdzielničać pradziusarski cenrt "Spamaš" u padrychtoŭcy biełaruskaha ŭdzielnika "Jeŭrabačańnia" ŭ nastupnym hodzie, Baranaŭ adkazaŭ, što takaja mahčymaść abmiarkoŭvałasia.
"Ale ja hłyboka pierakanany, što dla pačatku pavinna być pieśnia. Kali jość pieśnia, na jakuju možna rabić staŭku, to dalej treba prykładvać adpaviednyja namahańni", — pierakanany Baranaŭ.
