Ekśpierymient hrupy dzieviacikłaśnic z Danii pryciahnuŭ uvahu navukoŭcaŭ z usiaho śvietu.
Piać dziaŭčatak vyrašyli pravieryć, jakim čynam vypramieńvańnie ad Wi-Fi-rutara na rost raślin. Vyniki eksperymientu šakavali — bolšaść kalivaŭ, pasadžanych u niepasrednaj blizkaści ad Wi-Fi-kropki, zahinuli.
Piać vučanic adnoj z dackich škoł źmiaścili šeść skrynak z nasieńniem kres-sałaty ŭ pakoj z dvuma maršrutyzatarami biazdrotavaha internetu, a jašče šeść pastavili ŭ zvyčajnym pakoi biez dostupu da Wi-Fi. Za 12 dzion ekśpierymientu nasieńnie ŭ skrynkach, jakija stajali ŭ biezvajfajnym pakoi, mocna vyrasła, tady jak nasieńnie ŭ pakoi z vaj-faj-rutarami častkova zahinuła, častkova stajała biez rostu.
«Heta vyklikała ažyŭlenuju dyskusiju ŭ Danii što da patencyjnaj niebiaśpiečnaści roznych pryład, u tym liku mabilnych telefonaŭ i Wi-Fi-abstalavańnia, dla zdaroŭja čałavieka», — zajaviŭ nastaŭnik bijałohii Kim Chorsvejd.
Paśla taho jak stała viadoma ab hetym eksperymiencie, daśledavańniem zacikaviŭsia prafiesar Karalinskaha ŭniviersiteta ŭ Šviecyi. Sa słoŭ Chorsvejda, «jon paŭtoryć eksperymient, tolki ŭ sapraŭdnaj navukovaj łabaratoryi i z usioj surjoznaściu».
Ideja pastavić taki niezvyčajny eksperymient źjaviłasia ŭ školnic paśla taho, jak jany zaŭvažyli, što kali spać pobač z mabilnym telefonam, to na nastupny dzień stanovicca ciažej kancentravacca. Pakolki ŭ ich nie było abstalavańnia, kab pravieryć čałaviečy mozh na ŭzajemadziejańnie z vypramieńvańniem ad techniki, to vučanicy rašylisia vyprabavać svaje zdahadki na raślinach.
Mnohija vykazali zdahadku, što zusim nie vypramieńvańnie ad biazdrotavych pryład zahubiła sałatu-razuchu, a tempieratura: maršrutyzatary ž hrejucca, a skrynki stajali pobač. Adnak školnicy kažuć, što kantralavali tempieraturu ŭ abodvuch pakojach i palivali skrynki.
Anałahičnaje daśledavańnie było praviedziena try hady tamu ŭ Niderłandach, kali daśledčyki zaŭvažyli, što ŭ niekatorych drevaŭ u biznes-rajonach stali advalvacca kavałki kary. Navukoŭcy pastanavili pravieści daśledavańnie: 20 jasieniaŭ ciaham troch miesiacaŭ padpali pad roznyja typy vypramieńvańnia. Metaj ekśpierymientu było daviedacca, jak drevy reahujuć na Wi-Fi sihnały. Paśla apramieńvańnia drevy pačali vyjaŭlać typovyja prykmiety chvaroby, naprykład, śvincovy blask na liści.
