Pavodle źviestak Tavarystva płastyčnaj chirurhii, u Biełarusi vykonvajecca da 5 tysiač płastyčnych apieracyj štohod, i ich papularnaść raście. Pryblizna kožny siomy klijent klinik estetyčnaj chirurhii žadaje źmianić formu nosa. Siaredni košt rynapłastyki (apieracyi na nosie) – 7-8 miljonaŭ rubloŭ.
Čamu apieracyja Julii Kubaravaj u centry «Ekamiedservis» skončyłasia trahična? Aleh Stasievič, płastyčny chirurh i sakratar Tavarystva płastyčnaj chirurhii, nie navažvajecca kamientavać situacyju, pakul niama kančatkovych vynikaŭ kamisii.
«Lubaja chirurhičnaja apieracyja, luboje chirurhičnaje ŭmiašalnictva moža skončycca trahična. Možna navat palec parezać i zahinuć. Na žal, heta tak», — zaścierahaje Stasievič.
«Jość zvyščullivaść da niejkich preparataŭ u roznych ludziej. I vy nikoli nie daviedajeciesia pra jaje najaŭnaść, pakul nie ŭviedziacie čałavieku toj ci inšy preparat. Heta niemahčyma pradkazać».
Pa suśvietnaj statystycy, kala 15-20% pacyjentaŭ paśla rynapłastyki źviartajucca ŭ kliniku paŭtorna. Heta zusim nie aznačaje, što maje miesca miedyčnaja pamyłka. U bolšaści vypadkaŭ čałaviek nie zadavoleny vynikam apieracyi, jon raźličvaŭ na inšaje. «Heta ž estetyčnaja chirurhija. I pytańnie estetyki nie maje miežaŭ: možna razmaŭlać ab praporcyjach, ale ciažka kazać pra estetyku», — kaža Stasievič.
Śmiarotnyja zychody ŭ płastyčnaj chirurhii – źjava redkaja, adnak vyklučyć jaje całkam niemahčyma. Za apošnija dziesiać hod u Biełarusi viadoma ŭsiaho pra niekalki takich vypadkaŭ.
Imaviernaść pamierci paśla płastyčnaj chirurhii takaja ž, jak zachvareć na rak lohkich paśla adnoj spalenaj cyharety. «Ale kali ŭ vypadku z cyharetaj my majem spravu z vypadkovaściu ŭ čystym vyhladzie, to kali my havorym pra chirurhiju – lubuju – jość jašče čałaviečy faktar», — dadaje chirurh.
Pierad tym, jak lehčy pad nož chirurha, pacyjent padpisvaje damovu, heta značyć, daje tak zvanuju «infarmavanuju zhodu» na apieracyju. U damovie prapisvajucca mahčymyja nastupstvy, u tym liku i samyja trahičnyja.
U Biełarusi kala pałovy klijentaŭ klinik estetyčnaj chirurhii – zamiežniki. A značyć, našym śpiecyjalistam daviarajuć, dyj ceny ŭ nas nižejšyja, čym, naprykład, u susiedziaŭ. Da taho ž, Minsk – adnosta nievialiki horad, možna za adzin dzień abyści ŭsich chirurhaŭ i paraŭnać toje, što jany prapanujuć.
