Pavodle infarmacyi «Našaj Nivy», pryčynaj śmierci 23-hadovaj Julii Kubaravaj paśla płastyčnaj apieracyi na nosie ŭ centry «Ekamiedservis» mahła stać niaspraŭnaść abstalavańnia.U časie apieracyi dziaŭčyna ŭpała ŭ komu, ź jakoj nie vyjšła.
Voś što raskazaŭ «NN» śpiecyjalist, znajomy z chodam pravierki.
«U «Ekamiedservisie» dziaŭčynie dali ŭnutryvienny narkoz — tam tolki taki i robiać. Adnak pry hetym jaje padklučyli da aparata štučnaj vientylacyi lohkich z zakrytym konturam, h.zn. u jakim pavietra cyrkuluje pa kole. Choć zvyčajna ŠVŁ z zakrytym konturam užyvajuć pry hazavym narkozie: kab darahi narkoz nie vychodziŭ u pavietra i kab im nie dychali lekary.
U aparacie ŠVŁ z zakrytym konturam jość absorbier — prostymi słovami, filtr, jaki vydalaje lišak vuhlakisłaha hazu z pavietra, jakim dychaje čałaviek. U ekamiedservisaŭskim aparacie ŠVŁ hety absorbier byŭ užo ni na što nie prydatny, jaho musili zamianić jašče ŭ 2010 hodzie. I nie było ŭ ich hazavaha manitora, jaki pakazvaje kancentracyju hazaŭ i kaštuje zusim tanna. Tamu padčas apieracyi dziaŭčyna paprostu atruciłasia SO2 i ŭpała ŭ komu, ź jakoj tak i nie vyjšła — dla śmierci mozhu šmat času nie treba.Dziŭna čytać kamientary ludziej, jakija nie viedajuć, jak vyhladaje skalpiel, a vinavaciać va ŭsim chirurha. Jon rabiŭ svaju spravu i biez manitora, tolki pa vyhladzie pacyjentki, nie moh zaŭvažyć niejkaj patałohii.
U zdareńni vina ŭłaśnika abstalavańnia i anastezijołaha», — ličyć śpiecyjalist.
«Naša Niva» zapytałasia ŭ niekalkich daktaroŭ, ci imaviernaja takaja pryčyna trahiedyi.
«Hetaja situacyja nahadvaje śmierć dźviuch rožanic u Homieli, — kaža anastezijołah-reanimatołah Źmicier Sałoškin, — kali pabłytali bałony i puścili ŭ sistemu vuhlakisły haz.Tut, mahčyma, taksama nie sačyli za stanam absarbienta ŭ aparacie ŠVŁ. Vidać, padčas Julinaj apieracyi jon pierastaŭ vykonvać svaju funkcyju kančatkova, i ŭ kontury nakoplivaŭsia dyjaksid vuhlarodu. U vyniku — hipierkapničnaja koma.
Pry hetym biez hazavaha manitora možna i nie zaŭvažyć źmianieńni stanu. Navat naadvarot, vuhlakisły haz moža vyklikać parez — rasšyreńnie — drobnych sasudaŭ, i pacyjent nie sinieje, jak pry hipaksii, a zastajecca ružovym.Kisłarodu mahło być dosyć, ale manitor moh nie pakazvać utrymańnie SO2», — patłumačyŭ Sałoškin.
«Adnak samaje cikavaje ŭ hetaj situacyi, što lačebna-kantrolnaja rada Ministerstva achovy zdaroŭja, jakaja sabrałasia z hetaj nahody, zamiest taho, kab uziacca za «Ekamiedservis», zamiest pazbaŭleńnia kliniki licenzii na peŭny vid dziejnaści, pryniała rašeńnie pravieryć usie aniestezijałahičnyja słužby krainy.I zaraz pačnucca pierakryžavanyja pravierki: śpiecyjalisty adnaho centra buduć praviarać druhi, tyja — treci i h.d. Ujavicie, kolki čałaviek budzie adciahnuta ad pracy z-za chibaŭ u kankretnym miescy.
A luby anastezijołah, navat nie viedajučy pra kankretna hety vypadak, skaža, što prablemy pieršych sutak paśla apieracyi, kali pacyjent nie pračnuŭsia paśla apieracyi, kali pacyjenta ŭ biesprytomnym stanie zavieźli ŭ reanimacyju, jość prablemami aniestezijałohii».
Aleh Stasievič, płastyčny chirurh i sakratar Tavarystva płastyčnaj chirurhii, nie navažvajecca kamientavać situacyju, pakul niama kančatkovych vyvadaŭ kamisii.
«Pry takich situacyjach, niavažna dzie zdarajecca takoje, u dziaržaŭnaj ci kamiercyjnaj lakarni, stvarajecca kamisija. Potym sklikajecca kanfierencyja, analizujecca situacyja: što za pacyjent, jak jon rychtavaŭsia da apieracyi, što rabili na apieracyi – mienavita tak, pakrokava. Potym robicca niejkaja vysnova, a pakul što jość tolki emocyi. Viadoma, škada svajakoŭ», — dadaje Stasievič.
Na jahonuju dumku, śmierć mahła być źviazana i z reakcyjaj na leki, jakija ŭvodziacca z metaj narkozu.
Pavodle źviestak Tavarystva płastyčnaj chirurhii, u Biełarusi vykonvajecca da 5 tysiač płastyčnych apieracyj štohod, i ich papularnaść raście. Pryblizna kožny siomy klijent klinik estetyčnaj chirurhii žadaje źmianić formu nosa. Košt rynapłastyki (apieracyi na nosie) — 7—8 miljonaŭ rubloŭ.
Pavodle niekatorych źviestak, apieracyja Kubaravaj mahła kaštavać kala 17 miljonaŭ rubloŭ. Joj adnačasova pravili piareharadku i palapšali formu nosa.
Śmiarotnyja zychody ŭ płastyčnaj chirurhii – źjava redkaja, adnak vyklučyć jaje całkam niemahčyma.Za apošnija dziesiać hod u Biełarusi viadoma ŭsiaho pra niekalki takich vypadkaŭ.
Imaviernaść pamierci paśla płastyčnaj chirurhii takaja ž, jak zachvareć na rak lohkich paśla adnoj spalenaj cyharety. «Ale kali ŭ vypadku z cyharetaj my majem spravu z vypadkovaściu ŭ čystym vyhladzie, to kali my havorym pra chirurhiju — lubuju — jość jašče čałaviečy faktar», — dadaje chirurh.
Pierad tym, jak lehčy pad nož chirurha, pacyjent padpisvaje damovu, heta značyć, daje tak zvanuju «infarmavanuju zhodu» na apieracyju. U damovie prapisvajucca mahčymyja nastupstvy, u tym liku i samyja trahičnyja.
U Biełarusi kala pałovy klijentaŭ klinik estetyčnaj chirurhii — zamiežniki.A značyć, našym śpiecyjalistam daviarajuć, dyj ceny ŭ nas nižejšyja, čym, naprykład, u susiedziaŭ, kaža Stasievič.
U vypadku kali viersija ź niaspraŭnaściu aparata, što adpracavaŭ svoj resurs, paćvierdzicca, heta moža paciahnuć samyja niepryjemnyja nastupstvy dla kliniki.U samim «Ekamiedservisie» pakul nie dajuć nijakich kamientaroŭ.
