Lidary Abjadnanaj hramadzianskaj partyi (AHP) Anatol Labiedźka i «Respublikanskaj partyi Rasii — Partyi narodnaj svabody» (RPR — PARNAS) Barys Niamcoŭ zajavili ab metach svaich partyj — viarnuć krainy da demakratyčnaha raźvićcia.
Zajava była zroblena 24 krasavika ŭ Minsku na pres-kanfierencyi pa vynikach padpisańnia sumiesnaha dakumienta ab supracoŭnictvie dźviuch partyj.
Pavodle słoŭ Labiedźki, u AHP i RPR — PARNAS skłalisia «pravieranyja časam adnosiny». «My stavim pierad saboj adnolkavyja zadačy — viarnuć svaje krainy na demakratyčny šlach raźvićcia», — skazaŭ jon.
Niamcoŭ padkreśliŭ, što absalutna zhodny z hetymi słovami. «My chočam, kab Biełaruś i Rasija stali demakratyjami, kab u našych krainach mianiałasia ŭłada, było niezaležnaje pravasudździe».
Pavodle słoŭ Niamcova, «siońnia pucinskaja Rasija siamimilnymi krokami idzie pa šlachu Łukašenki».
Razam z tym, miarkuje jon, u Biełarusi značna bolš šancaŭ chutčej stać svabodnaj krainaj. «Kali vy staniecie svabodnaj krainaj, Rasija taksama budzie mieć taki ž šanc. U vas bolš šancaŭ stać demakratyčnymi, tamu što ŭ Rasii jość impierski kompleks, tamu što vy znachodziciesia ŭ siaredzinie Jeŭropy i ŭ vas niama kaŭkazskaha faktaru», — skazaŭ rasijski apazicyjny palityk.
Niamcoŭ taksama zajaviŭ, što Łukašenka i Pucin «vielmi padobnyja, choć i nienavidziać adzin adnaho». «Jany padobnyja pa falsifikacyjach, tamu što i adzin, i druhi abałvańvajuć svoj narod», — skazaŭ palityk.
Barys Niamcoŭ pryjechaŭ u Minsk viečaram 23 krasavika. Siońnia ŭ druhoj pałovie dnia ŭ ofisie Partyi BNF zapłanavana jaho sustreča ź biełaruskaj hramadskaściu, na jakoj budzie abmiarkoŭvacca tema biełaruska-rasijskich adnosin.
