U čaćvier, 18 krasavika, u adnym z maładziečanskich dvaroŭ znajšli andatru. Vodnaja žyviolina nieviadoma adkul źjaviłasia la padvalnaha akna doma pa vulicy Tałstoha.
Ab hości, jakaja zavitała u horad, paviedamili «Rehijanalnaj hazietcie» supracoŭniki ŽREU №2. Mienavita ŭ ich akienca i zazirnuła andatra.
Zdavałasia b, sprava prostaja: kab dapamahčy žyviolinie, treba jaje vyłavić i advieści ŭ bližejšy vadajom.
Pa dapamohu spačatku źviarnulisia ŭ MNS. Ale tam supracoŭnikam ŽREU adkazali, što z takimi spravami varta telefanavać nie da ich.
Karespandentka «RH» pačała šukać dapamohi ŭ inšych słužbach.
Spačatku vyzvaŭsia dapamahčy «Kamunalnik», u abaviazki jakoha ŭvachodzić vyłoŭlivańnie badziažnych sabak. Ale bryhada pa vyłoŭlivańni tolki adna, i na toj momant jana pracavała ŭ vioscy Markava. Kolki daviadziecca jaje čakać — nieviadoma. Da taho ž u ich niama śpiecyjalnych pryładaŭ dla vyłoŭlivańnia dzikich žyvioł.
Nastupny krok — zvarot da miascovaj palaŭničaj haspadarki. Zdavałasia b, jana maje niepasrednaje dačynieńnie da dzikich žyvioł. Ale adtul nas nakiravali pa inšym adrasie. Ciapier – u inśpiekcyju pa achovie pryrody.
Tam dapamahčy taksama nie zmahli.
Spačatku paraili: «prosta złavicie jaje, i chaj płyvie». Kudy moža płyć andatra ŭ centry horada — nie ŭdakładnili.
Paśla paraili źviarnucca da aficyjnaha dakumienta — rasparadžeńnia Maładziečanskaha rajvykankama ab dapamozie dzikim žyviołam u biadzie. A taksama – patelefanavać načalniku ŽREU, da jakoha adnosicca dom, u jaki zavitała andatra.
Historyja z doŭhimi telefanavańniami pryviała nas da načalnika taho samaha ŽREU, da akna jakoha pryjšła andatra. Mienavita jon i dapamoh u hetaj situacyi.
Užo praź niekalki chvilin paśla zvanka nam paviedamili, što andatru złavili i adviazuć u vadajom u Nasiłavie.
Atrymałasia, žyviolinka i sama viedała, dzie znachodzicca jaje ratunak i pryjšła pad nieabchodnaje akienca.
Ratavańnie zaciahnułasia bolš čym na try hadziny. Uvieś čas, pakul adna słužby pieranakiroŭvali nas adna na adnu, supracoŭniki ŽREU paśpieli pasiabravać z andatraj, prapanavaŭšy joj i pajeści, i papić.
