Pavodka ŭ basiejnie Prypiaci sioleta moža dasiahnuć histaryčnaha maksimumu i pry peŭnych umovach pieravysić jaho. Pra heta BiełaPAN paviedamiła načalnik adździeła hidrałahičnych prahnozaŭ Respublikanskaha hidramieteacentra Maryna Nahibina.
Pavodle jaje słoŭ, užo ciapier nazirajucca zatapleńni žyłych damoŭ, padvorkaŭ, haspadarčych pabudoŭ i ŭčastkaŭ aŭtadaroh u Pietrykaŭskim, Žytkavickim, Mazyrskim i Rečyckim rajonach Homielskaj vobłaści, u Pinskim i Stolinskim rajonach Bresckaj vobłaści. Adnak viasnovyja pracesy tolki pačynajuć raźvivacca, i razhar pavodki prahnazujecca na druhuju dekadu krasavika.
Jak skazała Nahibina, u suviazi ź vialikim nakapleńniem śniehu i prahnozam jaho intensiŭnaha rastavańnia składanaja pavodka čakajecca nie tolki ŭ basiejnie raki Prypiać, ale i ŭ basiejnie rek Sož, Biarezina, Vilija, u nižnim ciačeńni Dniapra i Dźviny.«U zaležnaści ad raźvićcia padziej padtapleńni mohuć być bolš značnymi ci, naadvarot, mienš značnymi, ale situacyja moža skłaścisia vielmi nieardynarnaja», — skazała śpiecyjalist.
Pakul na bolšaści rek zachoŭvajecca ledastaŭ i ledastaŭ z pałonkami. Miescami źjaviłasia vada na lodzie, lod paciamnieŭ. Taŭščynia ledzianoha pokryva na rekach składaje ad 20 da 52 sm, na inšych vadajomach — ad 48 da 62 sm. Razam z tym nazirajecca rost uzroŭniu vady, sutačnaja intensiŭnaść składaje ad 1 da 18 sm. Zakrajki i šuhachod adznačajucca na Vilii, na asobnych učastkach Niomana i Prypiaci, niekatorych ich prytokach, a taksama na prytokach Zachodniaha Buha i Soža.
