Krejmer zaklikaŭ ES da sankcyj suprać «Biełaruśkalija» 13

Zajava prahučała na seminary «Amerykana-biełaruskija adnosiny: pravy čałavieka i dyplamatyja», jaki prajšoŭ u Džordžtaŭnskim universytecie ŭ Vašynhtonie 25 sakavika.

Dejvid Krejmer zajaviŭ, što režym Łukašenki praciahvaje handlavać zbrojaj z krainami-izhojami i parušać fundamentalnyja pravavyja pryncypy demakratyčnaj dziaržavy,

adnak u arsenale ZŠA i Eŭraźviazu jašče jość niavykarystanyja metady cisku na biełaruskija ŭłady dziela taho, kab tyja vypuścili ź biełaruskich turmaŭ 11 palityčnych źniavolenych i praviali ŭ krainie demakratyčnyja pieraŭtvareńni.

Adnoj z takich mier uździejańnia, pavodle kiraŭnika Freedom House, moža stać nakładańnie ekanamičnych sankcyjaŭ na bujnyja biełaruskija kancerny, u pryvatnaści, na «Biełaruśkalij».

«Biassprečna, pradpryjemstva «Biełaruśkalij» — adno ź ich. Tym nia mienš Eŭrapiejski Źviaz taksama pavinien pierahledzieć svaje handlovyja adnosiny ź Biełaruśsiu ŭ cełym, bo pavieličeńnie abjomu handlu padryvaje efekt sankcyjaŭ, uviedzienych samim ža EZ.

Eŭraźviaz zrabiŭ vydatnuju pracu, što tyčycca sankcyjaŭ, adnak handal ź Biełaruśsiu, heta značyć — z Łukašenkam, adbivajecca na efektyŭnaści zroblenych zachadaŭ».

Na dumku Krejmera, Łukašenka stanović pahrozu nia tolki demakratyčnamu raźvićciu svajoj ułasnaj krainy, ale i mižnarodnaj supolnaści, bo jahony režym praciahvaje pastaŭlać zbroju ŭ niedemakratyčnyja dziaržavy:

«Łukašenka pradaje zbroju režymam-izhojam. Isnujuć aściarohi adnosna naroščvańnia Biełaruśsiu zbrojnych arsenałaŭ, niahledziačy na toje, što kraina admoviłasia ad svaich zapasaŭ jadziernaj zbroi paśla raspadu Savieckaha Sajuzu. Mnie zdajecca, my pavinny być zaniepakojenyja adnosna taho, što madel Biełarusi pad kiraŭnictvam Łukašenki moža być uziataja za prykład u inšych krainach. Heta značyć, što jaho režym pahražaje nia tolki tym, chto žyvie ŭnutry krainy, ale i za jaje miežami».

Miž tym dyrektar Eŭrapiejskaha adździełu pry Biuro pa pytańniach demakratyi, pravoŭ čałavieka i pracy Dziarždepartamentu ZŠA Majkł Ujechara, jaki taksama prysutničaŭ na mierapryjemstvie, zajaviŭ «Hołasu Ameryki», što ŭ suviazi z sytuacyjaj, jakaja skłałasia, urad ZŠA pastaviŭ pierad režymam Łukašenki šerah prostych umoŭ:

«U adnosinach ź Biełaruśsiu abstaviny skłalisia tak, što reputacyja biełaruskich uładaŭ nastolki drennaja, što my vyłučyli šerah umoŭ, zhodna ź jakimi Biełaruś pavinna pačać adpaviadać niekatorym patrabavańniam, pierš čym ź joj budzie ŭstalavany dyjaloh. Biełaruskija ŭłady viedajuć pra toje, čaho my ad ich čakajem, viedajuć našy ŭmovy. Jak tolki jany buduć vykananyja, my znoŭ zmožam pačać narmalny dyjaloh. Biełaruś — adzinaja kraina, u jakoj z-za patrabavańniaŭ miascovych uładaŭ my byli vymušanyja źnizić kolkaść supracoŭnikaŭ našaj ambasady. U nas navat niama ambasadara ŭ hetaj krainie, a mieć narmalny dyjaloh pry adsutnaści ambasadara adnoj z krain vielmi składana».

Ujechara taksama zaŭvažyŭ, što z prychodam Džona Kery na pasadu dziaržsakratara palityka ZŠA ŭ dačynieńni da Biełarusi nia źmienicca:

«Złučanyja Štaty paśladoŭna zaklikali ŭrad Biełarusi pravieści ŭ krainie źmieny ŭ halinie pravoŭ čałavieka, pašyryć palityčnuju prastoru, a taksama ŭzmacnić systemu strymańniaŭ i procivah va ŭładzie. Z prybyćciom Džona Kery ŭ Dziarždepartament palityka ZŠA ŭ dačynieńni da Biełarusi zastaniecca biaź źmienaŭ».

Radyjo Svaboda

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH