U biełaruskich ŚMI zaviałasia katehoryja «aŭtarski błoh». Takija isnujuć na sajtach «Biełaruski partyzan», radyjo «Svaboda», inšych resursach. Pa sutnaści, heta anałohija raździeła «Mierkavańni i pošta» ŭ tradycyjnaj presie. Z adnoj roźnicaj: psichałahična jany ŭsprymajucca bolš jak praciah ułasnych błohaŭ, sacyjalnych sietak, ź ich rassunutymi miežami dazvolenaha. Tamu niaredka tam možna pračytać rečy, ad jakich vušy vianuć. I tak jano sychodziła z ruk: błohi i sacyjalnyja sietki pakul praktyčna nie padpadajuć pad staryja normy rehulavańnia.
Mnohija ludzi i hatovyja byli b reahavać na publikacyi ŭ «aŭtarskich błohach» jurydyčna, ale ich strymlivaje jak adsutnaść jasnaha zakanadaŭčaha rehulavańnia, tak i niežadańnie psavać žyćcio niezaležnym resursam.U vyniku krytyka najčaściej zvodziłasia da abureńnia ŭ internecie ci na Miedyjakrytycy.baj. Choć časam u tych «błohach» pišuć takija rečy, da palemiki ź jakimi i apuskacca nie varta.
Adnak niadaŭna zdaryŭsia važny precedent.
Kamisija pa etycy Biełaruskaj asacyjacyi žurnalistaŭ pryznała parušeńnie etyčnych normaŭ u artykule Zianona Paźniaka na radyjo «Svaboda» «Sutnaść pravakacyi», dzie Paźniak abvinavačvaje historyka Ihara Kuźniacova ŭ sprobie «sutyknuć biełarusaŭ i palakaŭ pad dyktoŭku Maskvy».
Pradstaŭniki BAŽ patłumačyli, što ŭ artykule jość surjoznyja abvinavačvańni na adras Kuźniacova, ale adsutničajuć arhumienty.
Tak vyjšła, što pieršy padobny «kiejs» začapiŭ palityka Paźniaka, radyjo, ale važnaje nie heta. Važny sam precedent: Kamisija BAŽ paličyła, što etyčnyja standarty žurnalistyki kaniečnie raspaŭjudžvajucca i na aŭtarskija błohi ŭ ŚMI. Heta praryŭnaje dla BiełSMI rašeńnie.
Ujavicie sabie, što anałahičnyja zvaroty ŭ Kamisiju BAŽ składzie, naprykład, Juryj Zisier u dačynieńni da «Chartyi». Cikava, jakimi buduć nastupnyja rašeńni.
Kamisija pa etycy — nie represiŭny orhan, źviartacca ŭ jaje nie haniebna.Uvachodziać u jaje vielmi šanavanyja ludzi. Niehatyŭnaje rašeńnie Kamisii BAŽ, biezumoŭna, niepryjemnaje dla pavažnaha ŚMI. Redaktary
U hetym kantekście cikava, jakoj budzie reakcyja radyjo «Svaboda», što pieršym «trapiła pad kania». Dyrektar «Svabody» Alaksandr Łukašuk na pytańnie «Našaj Nivy», ci budzie niejkaja reakcyja na rašeńnie BAŽ z boku redakcyi, adkazaŭ: «Tak, padziakujem za ŭvahu i patłumačym svaju pazycyju na sajcie».
U svaju čarhu, BAŽu varta pakłapacicca pra ŭmovy dla rehularnaj pracy Kamisii pa etycy, raz užo jana maje šaniec stać dobrym miechanizmam rasstaŭleńnia kropak nad «i» ŭ niepaźbiežnych dla ŚMI kanfliktach.
