Da 25 sakavika, jak planavałasia raniej, vyznačyć mechanizm abrańnia adzinaha kandydata na prezydenta Biełarusi ad demakratyčnych siłaŭ nie atrymajecca.
Pra heta paviedamiŭ adzin ź inicyjataraŭ akcyi 25 sakavika — staršynia Partyi BNF Alaksiej Janukievič. Jon skazaŭ, što
sytuacyja prajaśnicca tolki vosieńniu.
Data 25 sakavika 2013 hodu jak dzień, da jakoha treba vyznačycca nakont adzinaha kandydata, fihuravała ŭ dakumentach sojmu Partyi BNF. Akramia hetaj partyi, u kansultacyjach udzielničajuć kampanija «Havary praŭdu» i ruch «Za svabodu». Partyjny lider Alaksiej Janukievič tłumačyć, čamu termin 25 sakavika akazaŭsia nierealnym:
«Tut niekalki faktaraŭ adyhryvajuć svaju rolu. Adzin — toje, što, mahčyma, niekatoryja subjekty našych pieramovaŭ siońnia bačać dla siabie ŭžo inšyja pryjarytety. Taja ž kampanija „Havary praŭdu“ siońnia pieravažna hladzić na miascovyja vybary. Na hetym skancentravanyja ŭ pieršuju čarhu ŭsie ichnyja arhanizacyjnyja vysiłki i plany.
Častkova, ja dumaju, heta źviazana i z tym, što niama peŭnaści ŭ niejkich asobach. Nu, nie vymaloŭvajucca ŭ niekatorych partneraŭ jaŭnyja postaci, jakija b mahli pretendavać na rolu adzinaha kandydata. Moža, i jość niejki śpis kandydataŭ. Ale ŭ im niama jaŭnych favarytaŭ. I tamu chočacca ŭziać niejki dadatkovy čas, kab hety śpis pašyryć. Moža, znajści niejkaha novaha čałavieka. Moža, jon sam źjavicca».
Čym raniej budzie nazvanaje proźvišča adzinaha kandydata, tym lepiej, —ličyć palitolah Alaksandar Kłaskoŭski:
«Ź inšaha boku, adziny kandydat — heta nie samameta. Heta pavinna być tolki adnym sa źvionaŭ skaardynavanaj stratehii, ahulnaj prahramy. I samaja hałoŭnaja biada, što na siońnia niama takoj ahulnaj stratehii. A jašče niama palityčnaj voli ŭ asnoŭnych hulcoŭ dla taho, kab znajści niejki kansensus. I, naturalna, chtości pavinien pry hetym achviaravać svaimi ambicyjami.
Tamu ja dumaju, što razumny krok zrabiŭ toj ža Niaklajeŭ — nie taŭčy vadu ŭ stupie, nie śmiašyć narod, hruba kažučy, tym, što znoŭ nia mohuć parazumiecca. A ŭvieści časovy maratoryj na adzinaha kandydata».
Zusim inšuju reakcyju vyklikała zajava Ŭładzimiera Niaklajeva ŭ staršyni Abjadnanaj hramadzianskaj partyi Anatola Labiedźki:
«My, ščyra kažučy, rasčaravanyja apošnimi zajavami Ŭładzimiera Niaklajeva pra toje, što jany spyniajuć kansultacyi ŭ farmacie troch. My ich čakali, bo ŭ AHP jość svaja pazycyja.
Praz usienarodnaje hałasavańnie, praz prajmeryz pryciahnuć jak maha bolšuju kolkaść ludziej da supolnaj pracy.I my raźličvali, što paśla taho, jak try hetyja struktury vyznačacca sa svaim bačańniem, to tady nastupić mažlivaść dla kansultacyjaŭ ź imi. Albo zblizić pazycyi i vyjści na niešta supolnaje. Albo skazać: nie, my budziem iści paralelna».
Demakratyčnyja siły buduć vymušanyja viarnucca da kansultacyjaŭ, upeŭnieny Alaksandar Kłaskoŭski:
«Hetaje pytańnie ŭsio roŭna nijak abyjści nia ŭdasca. I chaj nia zaraz, a praz paŭhoda ci hod jano ŭsio roŭna stanie rubam. Ale jak častka ahulnaj stratehii. Voś heta ja chaču padkreślić».
