Lidary najbujniejšych prafsajuznych abjadnańniaŭ Rasii i Biełarusi padpisali zvarot da kiraŭnikoŭ dźviuch dziaržaŭ Uładzimira Pucina i Alaksandra Łukašenki. List tyčycca padpisanaha Łukašenkam u śniežni minułaha hoda dekreta №9 "Ab dadatkovych mierach pa raźvićci drevaapracoŭčaj pramysłovaści",jaki faktyčna zabaraniaje zvalnieńnie pa ŭłasnym žadańni pa inicyjatyvie rabotnikaŭ.
Jak adznačajecca ŭ prafsajuznym zvarocie, u adpaviednaści z hetym dekretam «admianiajecca prava rabotnikaŭ haliny na zvalnieńnie, što faktyčna ŭvodzić u adnoj z častak Sajuznaj dziaržavy prymusovuju pracu».
Zvarot da kiraŭnikoŭ Rasii i Biełarusi padpisali prezident Kanfiederacyi pracy Rasii Barys Kraŭčanka, staršynia Fiederacyi niezaležnych prafsajuzaŭ Rasii Michaił Šmakaŭ i staršynia Biełaruskaha kanhresu demakratyčnych prafsajuzaŭ Alaksandr Jarašuk. Prafsajuznyja lidery dźviuch dziaržaŭ nahadvajuć, što z dapamohaj prymusu rabotnikaŭ «niemahčyma vyrašyć prablemu pavyšeńnia efiektyŭnaści i pradukcyjnaści pracy, chutčej naadvarot - možna atrymać prama supraćlehły vynik».
«Upeŭnienyja, što šlachi vyrašeńnia prablemy lažać zusim u inšaj płoskaści, - adznačajecca ŭ zvarocie prafsajuznych lideraŭ Rasii i Biełarusi.- Na naš pohlad, u śviecie nie isnuje inšaha srodku pavyšeńnia adkaznaści rabotnikaŭ, čym ekanamičnaja zacikaŭlenaść, stymulavańnie pracavać efiektyŭna i vysokapradukcyjnyja. Pry hetym pavinna niaŭchilna zabiaśpiečvacca vykanańnie Kanstytucyi i nacyjanalnych zakonaŭ ab pracy, Kanviencyj Mižnarodnaj arhanizacyi pracy».
«Taki padychod źjaŭlajecca adzina pravilnym, razumnym i apraŭdanym jak z sacyjalna-ekanamičnaj, tak i z maralnaha punktu hledžańnia, pakolki farmuje ŭ pracoŭnaha čałavieka pačućcio ŭłasnaj hodnaści i samapavahi, a taksama pavahi da vynikaŭ svajoj pracy», - padkreślivajecca ŭ tekście zvarotu. U suviazi z hetym u adras prezidentaŭ Rasii i Biełarusi hučyć zaklik acanić nastupstvy realizacyi Dekreta № 9 dla pracoŭnych i hramadskaści abodvuch krain.
«Taki krok, niesumnienna, budzie tolki spryjać pracesam intehracyi, raźvićcia i roskvitu Rasii i Biełarusi, dasiahnieńni vysakarodnaj zadačy - zabieśpiačeńnia hodnaha žyćcia narodaŭ našych brackich krain", - havorycca ŭ tekście zvarotu.Na dumku prafsajuznych lidaraŭ, admiena hetaha dekreta nie tolki dazvolić likvidavać niebiaśpiečny precedent pracoŭnych adnosin, zasnavanych na prymusie, ale i daść mahčymaść u dalejšym farmavać zakanadaŭčuju bazu ŭ Rasii i Biełarusi na asnovie strohaha zachavańnia pravoŭ i intaresaŭ rabotnikaŭ najomnaj pracy.
