Hatel «Kempinski» na praśpiekcie Niezaležnaści razburaje ansambl učastka praśpiekta ad Kastryčnickaj płoščy da płoščy Pieramohi.
Pałac Respubliki ŭtvaryŭ daminantu na miažy histaryčnaha centra.
Pałac Respubliki i novy ofis velcom navisajuć nad Internacyjanalnaj.
Novy ofis velcom i 23-paviarchovy hmach na Staražoŭcy na dumku śpiecyjalistaŭ skažajuć abrysy histaryčnaha centra stalicy.
23-paviarchovy dom na Staražoŭskaj razdušyŭ saboj cacačnaje Trajeckaje pradmieście.
Handlovy centr z parkinham daminuje nad zabudovaj kvartała.
Novaje ŭ abrysach Minska.
Biznes-centr na pr. Pieramožcaŭ tyrčyć jak tyčka.
Navat zvykły budynak «Biełpramprajekta» trapiŭ u śpis niepažadanych.
Budynki «Biełpramprajekta» i Ekśpiertna-kryminalistyčnaha centra MUS bačnyja až z Trajeckaha pradmieścia.
Budynak Ekśpiertna-kryminalistyčnaha centra MUS na Vaładarskaj.
Budynki-parušalniki daminujuć nad histaryčnym centram.
Ministr kultury Barys Śviatłoŭ zaćvierdziŭ Prajekt zony achovy historyka-kulturnaj kaštoŭnaści — histaryčnaha centra Minska. Siarod inšaha, dakumient zabaraniaje budaŭnictva šmatpaviarchovych budynkaŭ na terytoryi vakoł histaryčnaha centra stalicy, a taksama vyznačaje status raniej zbudavanych na hetaj terytoryi abjektaŭ.
Zbudavanyja tut šmatpaviarchoviki pryznajucca dysharmaničnymi pabudovami, jakija parušajuć cełasnaść histaryčnych ansamblaŭ i pieraškadžajuć usprymańniu kaštoŭnaściaŭ.
U śpis dysharmaničnych budynkaŭ u centry Minska trapili Pałac Respubliki, budynak sotavaj kampanii velcom na Kastryčnickaj płoščy, žyły dom «La Trajeckaha», budynak kampanii «Morteks BCZ», što budujecca na vulicy Internacyjanalnaj, budynak Dziaržaŭnaha ekśpiertna-kryminalistyčnaha centra na Vaładarskaha, budučy hatel «Kempinski» na praśpiekcie Niezaležnaści, budynak «Biełpramprajekta» na płoščy Svabody i budučy biznes-centr na praśpiekcie Pieramožcaŭ.
Staršynia prezidyuma Respublikanskaj rady Biełaruskaha dobraachvotnaha tavarystva achovy pomnikaŭ historyi i kultury Anton Astapovič kamientuje padzieju sa strymanym aptymizmam.
«Vielmi važna, što na ŭzroŭni ministerstva robicca acenka pamyłak, dapuščanych u horadabudaŭnictvie. Asabliva, što datyčyć parušeńnia zakanadaŭstva ŭ śfiery achovy histaryčnaj spadčyny», — adznačaje plusy Astapovič.
Minusy jon farmuluje z dapamohaj pytańniaŭ. Čamu śpis taki karotki? Kali «niepažadanym» pryznali budynak «Biełpramprajekta», to čamu za kadram zastaŭsia dom «Na Niamizie»? Toje samaje, pierakanany Astapovič, datyčyć šerahu inšych abjektaŭ — naprykład, častki zabudovy na vulicy Handlovaj, šerahu navabudaŭ na vulicy Revalucyjnaj, skandalnaj pierabudovy byłoha klaštaru biernardzincaŭ u hatelny kompleks i h.d.
Anton Astapovič źviartaje ŭvahu na istotny momant. Na jaho dumku, ministerstva pryznała, što parušyła zakon, sankcyjanavaŭšy pabudovu ŭ histaryčnym centry zaviedama nieprachadnych abjektaŭ.Tavarystva achovy pomnikaŭ nie adzin raz źviartała ŭvahu na parušeńni. Heta i dom u Trajeckim pradmieści, i ofis velcom na Kastryčnickaj, i handlovy centr z parkinham na Internacyjanalnaj. «My nie padmianiajem saboj prakuraturu, niachaj jana zrobić adpaviednyja vysnovy. Ale pakul Minkultury vyhladaje jak unteraficerskaja ŭdava, jakaja sama siabie vysiekła bizunom».
Staršynia Tavarystva achovy pomnikaŭ patłumačyŭ, čamu kožny z pamianionych abjektaŭ nie ŭpisvajecca ŭ histaryčny centr Minska.
Hatel «Kempinski» na praśpiekcie Niezaležnaści razburyć ansambl praśpiekta ad Kastryčnickaj płoščy da płoščy Pieramohi. Jon utvoryć dysanansnuju daminantu na miažy histaryčnaha centra.
Pałac Respubliki na Kastryčnickaj płoščy pačali budavać u 1985 hodzie, skončyli ŭ 2001-m. Jon utvaryŭ novuju daminantu na miažy histaryčnaha centra. Anton Astapovič miarkuje, što pabudova pałaca pačałasia ŭ inšaj pravavoj sistemie. Tamu źjaŭleńnie hetaha budynka, a taksama hmachaŭ «Biełpramprajekta» i Dziaržaŭnaha ekśpiertna-kryminalistyčnaha centra možna ličyć pravamiernym. Tym nie mienš, heta nie zdymaje ź ich statusa dysharmaničnych zbudavańniaŭ.
Handlovy centr z parkinham na Internacyjanalnaj budujecca z parušeńniem šerahu artykułaŭ Zakona «Ab achovie historyka-kulturnaj spadčyny». Pry pabudovie byŭ paškodžany kulturny płast, abjomna-płanirovačnaja struktura kvartała była źmienienaja, najpierš za košt vyšyni budynka.
Biznes-centr kampanii velcom na pieršy pohlad dobra ŭpisaŭsia ŭ isnuju zabudovu Kastryčnickaj płoščy. Adnak, kali hladzieć ź inšaha boku, jon faktyčna navis nad vulicaj Internacyjanalnaj.
Biznes-centr na praśpiekcie Pieramožcaŭ, što budujecca na miescy byłoj kaviarni «Rečańka», taksama parušaje rehłamient pa vyšyni zbudavańnia. Pa słovach Astapoviča, jon u ideale musić być nie vyšejšym za inšyja budynki, što ŭtvarajuć ansambl praśpiekta.
23-paviarchovy žyły dom na Staražoŭskaj maje za saboj ceły šlejf parušeńniaŭ, kaža Astapovič. Pry jaho pabudovie byli parušanyja kulturny płast, łandšaft, abjomna-płanirovačnaja struktura kvartała.
U Ministerstvie kultury pakul ustrymlivajucca ad adkazaŭ, što kankretna čakaje pieraličanyja abjekty.
Pa kožnym ź ich z časam abiacajuć pryniać asobnaje prajektnaje rašeńnie: abo adaptavać, abo pamienšyć pavierchavaść. Ale heta — nie siońnia, i nie zaŭtra, padkreślivajuć va ŭpraŭleńni pa achovie historyka-kulturnaj spadčyny i restaŭracyi Ministerstva kultury.
