Ciapier adrepietavać CT možna i na kampjutary 1

— U studzieni ŭ krainie jakraz startavaŭ druhi etap repietycyjnaha testavańnia, jaki budzie doŭžycca da kanca lutaha. Padčas pieršaha etapu, jaki zaviaršyŭsia ŭ śniežni, było apracavana 59 tysiač čałavieka-testaŭ. Takim čynam, sioletnija abituryjenty akazalisia bolš aktyŭnymi za svaich papiarednikaŭ, — raskazaŭ žurnalistu «Źviazdy» dyrektar Respublikanskaha instytuta kantrolu viedaŭ Mikałaj FIAŚKOŬ. — Na druhi raŭnd taksama budzie vyniesiena pa dva varyjanty testaŭ na kožny pradmiet. Pracedura repietycyjnaha testavańnia (z vykarystańniem papiarovych błankaŭ adkazaŭ) abituryjentam užo dobra viadomaja. My nastojvajem na tym, kab arhanizatary «repietycyi» prytrymlivalisia ŭsich pravił praviadzieńnia CT, kab adrazu nastroić abituryjentaŭ na surjozny ład i zmadelavać realnuju psichałahičnuju abstanoŭku praviadzieńnia ekzamienu: nijakich mabilnikaŭ, dapamožnikaŭ i šparhałak u ekzamienacyjnaj aŭdytoryi być nie pavinna! Arhanizataram dazvalajecca kansultavać udzielnikaŭ «repietycyi» tolki pa technałohii raboty nad testam i pa paradku zapaŭnieńnia błanka. Nijakich kansultacyj pa źmieście testaŭ nie dapuskajecca.

Kampjutarnaje testavańnie — novaja forma «repietycyi» budučaha CT, jakuju treba razhladać jak dadatkovuju mahčymaść «patreniravacca» napiaredadni adkaznych ispytaŭ. Hałoŭnaj pieravahaj kampjutarnaha testavańnia źjaŭlajecca mahčymaść vykanańnia testa ŭ dvuch režymach: kantrolnym, jaki maksimalna nabližany da ŭmoŭ centralizavanaha testavańnia, i trenirovačnym. Trenirovačny režym praduhledžvaje vykarystańnie dadatkovaj infarmacyi, jakaja padkazvaje abituryjentu pravilnaje rašeńnie testavaha zadańnia i praduhledžvaje mahčymaść paraŭnańnia svajho varyjanta adkazu z etałonnym. Prajści kampjutarnaje testavańnie možna tolki na bazie Respublikanskaha instytuta kantrolu viedaŭ, zatoje vyniki vykanańnia testa stanoviacca viadomyja adrazu paśla zaviaršeńnia raboty.

U budnyja dni kampjutarnaje testavańnie budzie pravodzicca raz na dzień, a ŭ subotu i niadzielu ŭ instytucie hatovy testavać achvotnych i trojčy na dzień.

Zarehistravacca dla ŭdziełu možna na sajcie instytuta www.riks.bu u raździele «kampjutarnaje testavańnie». Cana testavańnia pa adnym vučebnym pradmiecie składaje 34 900 rubloŭ.

Mikałaj Fiaśkoŭ udakładniŭ, što na kampjutarnym i repietycyjnym testavańni abituryjentam buduć prapanoŭvacca roznyja varyjanty testaŭ, ale zadańni dla ich buduć uziatyja z ahulnaha banka testavych zadańniaŭ, a testy dla kampjutarnaha testavańnia buduć składacca pa toj ža śpiecyfikacyi, što i dla repietycyjnaha testavańnia. Śpiecyfikacyja — heta svojeasablivy ałharytm pabudovy testa: jana vyznačaje jaho strukturu, kolkaść zadańniaŭ pa kožnaj temie, uzrovień ich składanaści i h.d. Treba mieć na ŭvazie, što pad vyhladam padrychtoŭki da centralizavanaha testavańnia asobnyja ŭstanovy adukacyi taksama prapanujuć prajści tak zvanaje kampjutarnaje testavańnie, ale testy i technałohija apracoŭki vynikaŭ takoha testavańnia nie majuć ničoha ahulnaha z centralizavanym i repietycyjnym testavańniem. Hałoŭnaje adroźnieńnie kampjutarnaha testavańnia zaklučajecca ŭ tym, što zamiest zapaŭnieńnia papiarovaha błanka adkazaŭ abituryjenty buduć mieć spravu ź jaho elektronnaj vyjavaj.

Pry padrychtoŭcy da repietycyjnaha testavańnia Mikałaj Fiaśkoŭ paraiŭ abituryjentam karystacca zbornikami, kudy ŭvajšli testy, prapanavanyja ŭdzielnikam CT papiarednich hadoŭ. U pryvatnaści, u prodažy jość poŭnyja zborniki testaŭ za 2007–2011 hady pa biełaruskaj, ruskaj i anhlijskaj movach, matematycy, fizicy, chimii i bijałohii. Jość taksama zborniki z zadańniami CT 2012 hoda pa ŭsich 14 dyscyplinach. Zborniki dapamahajuć prasačyć asnoŭnyja tendencyi ŭ farmiravańni zadańniaŭ centralizavanaha testavańnia za apošnija hady, sistematyzavać i samastojna prakantralavać svaje viedy.

Dla pavyšeńnia efiektyŭnaści ad udziełu ŭ repietycyi CT možna skarystacca taksama pasłuhami rehijanalnaha centra testavańnia i prafiesijnaj aryjentacyi moładzi pry Hrodzienskim dziaržaŭnym univiersitecie imia Ja.Kupały, jaki ŭžo nie pieršy hod arhanizuje pry padtrymcy Respublikanskaha instytuta kantrolu viedaŭ indyvidualnyja kansultacyi dla ŭdzielnikaŭ repietycyjnaha testavańnia. Tam mohuć prakansultavać luboha abituryjenta, niezaležna ad punkta prachodžańnia testavańnia i miesca jaho žycharstva. Meta takoj kansultacyi — likvidacyja prabiełaŭ u viedach i dalejšaja padrychtoŭka pa tematycy testavych zadańniaŭ, ź jakimi abituryjenty nie spravilisia na «repietycyi» ekzamienu. Indyvidualnaja kansultacyja ŭjaŭlaje saboj rassyłku vučebna-mietadyčnaha pakieta, jaki źmiaščaje tematyku raździełaŭ školnaj prahramy pa kožnym niapravilna vykananym zadańni z ukazańniem hoda ci kłasa vyvučeńnia adpaviednaha raździeła, z rekamiendavanym śpisam vučebnaj i mietadyčnaj litaratury, sa źmiestam niapravilna vykananych zadańniaŭ, pravilnymi adkazami i ŭkazańniem da pravilnaha rašeńnia. Kansultacyjnyja pasłuhi akazvajuć udzielnikam repietycyjnaha testavańnia taksama Licej BDU i Biełaruski dziaržaŭny ŭniviersitet.

Darečy, kolkaść dyscyplin, jakija možna zdavać na repietycyjnym testavańni, u adroźnieńnie ad CT, nichto nie abmiažoŭvaje. Taksama da ŭdziełu ŭ repietycyjnym testavańni dapuskajucca i dziesiacikłaśniki…

Pieravahi kampjutarnaha testavańnia:

— vynik vykanańnia testa viadomy adrazu ž paśla raboty nad im;

— mahčymaść paŭtorna vykanać zadańni, u jakich buduć dapuščany pamyłki, skarystaŭšysia pry hetym «padkazkaj»;

— mahčymaść aznajomicca z aŭtarskim rašeńniem prapanavanych zadańniaŭ.

Kampjutarnaje testavańnie pravodzicca štodnia pa adrasie: h. Minsk, vuł. Čajkoŭskaha, 7, k. 12.

paniadziełak-piatnica: 14.30;

subota, niadziela: 9.00, 12.00, 15.00.

0

0

0

0

0

0

Źviazda

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH