Vasil, kiroŭca samazvała na «Hranicie», kaža, što zarabiŭ za miesiac 15 miljonaŭ. Adnak, zaŭvažaje jon, u hetym pavyšeńni zarobku jość i svaje niuansy, bo płacić zaraz stali za kolkaść pieraviezienaha kamieniu:
«Ja atrymlivaŭ 7–8, a za hety miesiac mnie naličyli kala 15 miljonaŭ. Adnak, tut jak — chto vozić, toj atrymoŭvaje. Raniej nam za ramont płacili lepš — premiju davali. Chłopcy, što tolki ŭładkavalisia i na stareńkich BiełAZach pracujuć, paatrymoŭvali tolki pa 5–6 młn. A jak jany rejs toj zrobiać, kali ŭ ich BiełAZ vypracavaŭ svoj resurs?»
Rabočy kaža, što kiroŭcy samazvałaŭ, jakija pieravieźli šmat kamieniu, zarabili pa 14–17 miljonaŭ. Vasil upeŭnieny, što rost zarobku na pradpryjemstvie adbyvajecca najpierš u vyniku pratestu pracoŭnych:
«Heta na 300% adyhrała… Viedajecie, jak jany bajacca zaraz hetaha niezaležnaha prafsajuza? Jak ahniu!Pažartavali byli chłopcy, što treba pa novamu vychodzić z prafsajuza, bo niešta tam im nie spadabałasia. Tolki skazali miž saboj — užo načalstva viedaje i biažyć da nas. Maŭlaŭ, što ŭ vas takoje, my vam usio zrobim!»
Kiraŭnik supołki niezaležnaha prafsajuza na «Hranicie» Aleh Stachajevič taksama pahadžajecca z dumkaj, što pratest zmusiŭ padvyšać zarobki:
«Na śniežań 2011 hoda zarobak BiełAZistaŭ byŭ 2 miljony 700 tysiač — 3 miljony 500 tysiač rubloŭ. Zaraz my pryjšli da tych vynikaŭ, jakija chacieli b mieć, ja dumaju, na ŭsich pradpryjemstvach Biełarusi».
Adnak, jon maje zaściarohi, što ŭ vypadku poŭnaha źniščeńnia pracoŭnaha ruchu situacyja z pamieram zarobku moža źmianicca.Aleh Stachajevič kaža, što z rostam apłaty pracy dasiahnutaja adna z metaŭ pratestu.
***
- Naprykancy 2011 hoda niekalki socień pracaŭnikoŭ pradpryjemstva pa zdabyčy budaŭničaha kamieniu «Hranit» u Mikaševičach napisali zajavy, što vychodziać z aficyjnaha prafsajuza. Takim čynam byŭ vykazany pratest suprać nizkich, na ich dumku, zarobkaŭ, hreblivych adnosinaŭ z boku načalstva i biaździejnaści prafsajuza. Pracoŭnyja abviaścili, što stvarajuć na pradpryjemstvie supołku Biełaruskaha niezaležnaha prafsajuza. Adrazu paśla hetaha siabry niezaležnaha prafsajuza adčuli cisk z boku administracyi.