Paśla našumiełaj publikacyi «Interdzievački» my vyrašyli padyści da pytańnia ź inšaha boku. I adšukali 8 dziaŭčat-zamiežnic, jakija mieli ci majuć znosiny ź biełaruskimi chłopcami. Čytaj novaje daśledavańnie Sašy Batler.
Dyjana, 22 hady, Łatvija
Studentka, była vałanciorkaj u Biełarusi.
– Padčas kryzisu 2008 hoda z Łatvii źjechała šmat razumnych, pracazdolnych maładych ludziej za miažu. Voś i atrymlivajecca, što na adnaho dobraha chłopca ŭ nas pa 2-3 dziaŭčyny, tamu maładyja ludzi ŭ Łatvii razbeščanyja ŭvahaj. U bolšaści jany nie vielmi imknucca da surjoznych adnosinaŭ, siamji, dziaciej. U Biełarusi takoj razbeščanaści siarod chłopcaŭ ja nie bačyła. U Miensku paŭsiul možna pabačyć parački, heta vielmi pryjemna.
Adzinaje, što dla mianie tak i zastałosia vialikaj zahadkaj: čamu mała chto z vašych chłopcaŭ moža pachvalicca narmalovymi adnosinami ź dziaŭčynaj? Moža, jany prosta sami nie viedajuć, čaho žadajuć i kim buduć u budučyni? Usie chałaściaki, navat simpatyčnyja.
U Łatvii takich by zacapali daŭno. Chacia, moža, i dobra, što niama takoj vidavočnaści – siabar jon tabie ci niešta bolšaje.
U nas chłopcy tolki i robiać, što puskajuć pył u vočy, abiacajuć hory i zorku ź nieba, a jak vynik – ślozy i kryŭdy. U biełaruskich mužčyn hetaja dvuchabličnaść nie tak vyrazna prajaŭlajecca.
Znajomyja mnie biełarusy vyhladajuć bolš žyvymi, aktyŭnymi, siabroŭskimi. Pra vašych chłopcaŭ kažuć, što jany šmat kartochi jaduć i pjuć, ale, moža, i dobra, što ŭ vas akurat takaja reputacyja – u Ryzie na inšaziemnych mužčyn kosa pahladajuć, bo šmat chto ź ich jedzie da nas praź mify pra seks-turyzm.
Da taho ž, u vas chłopcy vyhladajuć bolš darosłymi, stałymi ŭ paraŭnańni z łatyšami. U svaje 25 biełarusy padobnyja na 25-hadovych, a ŭ našych chłopcaŭ rost nibyta spyniajecca na 18 hadach.Jamu mohuć być usie 26 hadoŭ, a jon tak i budzie žyć z baćkami i navat nie dumać pra pierajezd abo znosiny ź dziaŭčatami. I chacia ŭ Biełarusi, jak i ŭ Łatvii, mała sonca, mnie padajecca, biełaruskija chłapcy bolš pazityŭnyja.
Albina, 21 hod, Litva
Pracuje ŭ pravaachoŭnaj arhanizacyi, maje bojfrenda ź Biełarusi.
– Paznajomilisia z Pašam u mižnarodnym łahiery dla moładzievych lidaraŭ, my razam užo 2 hady. Ja liču, što mnie vielmi pašancavała.
Moj chłopiec vielmi pryhoža da mianie zalacaŭsia. Składana tolki, što pieraškadžaje vizavy barjer – my možam bačycca tolki pa vychodnych. Adnak chutka my aženimsia, i Paša pierajedzie žyć da mianie ŭ Vilniu.Mahčyma, my naohuł pajedziem kudy jašče. U Biełaruś nie źbirajemsia – tam nizki ŭzrovień žyćcia, šmat palityčnych prablemaŭ.
Biełaruskija chłopcy niejkija svaje, prostyja, chatnija, dla ich nie treba ničoha asablivaha rabić. Zaŭsiody mohuć adramantavać štości ŭ chacie, kali złamałasia. Adzinaje, kali ŭžo jakaja prablema ŭźnikła, treba, kab vyrašaŭ jaje mienavita Paša. Naprykład, proha na kamputary palacieła, a ja sama razabrałasia – dyk jon moža pakryŭdzicca.
Litoŭcy bolš raśpieščanyja, biełaruskija chłopcy ž vielmi mužnyja, da dziaŭčat staviacca z bolšaj pavahaj i pašanaj.
Kankretna majmu chłopcu nie staje ramantyčnaści, ale ž možna i bieź jaje abyścisia. Mnie navat padabajecca, što niama hetych siusiukańniaŭ i pusiukańniaŭ.
U nas ličycca, što vašyja chłapcy mohuć šmat pić i nie napivacca, a nakont jakaściaŭ charaktaru… Kažuć, čto chłopcy mocnyja i mužnyja, bo ŭ ich ža tam vioska, bulba, Łukašenka, samahon.
A ŭ seksie ja sa svajho dośviedu viedaju, što biełarusy – małajcy! Staŭlu dziasiatačku.
Anna, 28 hadoŭ, Šviejcaryja
*na ŭmovach ananimnaści
Defiektołah u škole dla dziaciej z asablivaciami raźvićcia, była vałanciorkaj u Biełarusi 1,5 hoda.
– Biełaruskim chłopcam nie staje razumieńnia taho, što dziaŭčyna – pierš za ŭsio čałaviek. Mnie padajecca, heta źviazana z hiendarnymi stereatypami. Naprykład, u Šviejcaryi pryniata mieć siabroŭskija znosiny z chłopcami. A voś kali razmaŭlaješ ź biełarusam, nibyta adčuvaješ pasył: ty dziaŭčyna, ja mužčyna, i my budziem mieć znosiny tolki da taho momantu, pakul ty pryvablivaješ mianie jak žančyna. U nas pa-inšamu. Kali ty cikavaja jak čałaviek – usio ok, davaj siabravać. Moža, tamu mnie składana mieć spravu z typovymi biełaruskimi dziaŭčatami.
Čym adroźnivajucca šviejcarskija chłopcy ad biełaruskich? Pjuć i ŭ vas, i ŭ nas. Biełarusy bolš uvažlivyja – dapamahajuć dziaŭčatam u tych spravach, ź jakimi tyja i sami mohuć razabracca.Naprykład, padnieści rečy, jakija dla zdarovaj dziaŭčyny i nie ciažkija zusim, dapamahčy vyjści z aŭtobusa, ciahnika.
U nas naohuł ličać, što Biełaruś – častka Rasii, a raz «biełaja», tam, napeŭna, śnieh uvieś čas idzie. A mify… datyčać usich chłopcaŭ z byłych krain Savieckaha Sajuza: harełku pastajanna pjuć, jeździać na chutkich mašynach, lubiać marnavać hrošy na darahija, niepryhožyja rečy, zarablajuć nielehalna, šmat mafii.
Inšyja historyi čytajcie pa hetaj spasyłcy.
