16-hadovy Kastuś Tarasaŭ.
Sajt tarasau.com zapracavaŭ jašče ŭ žniŭni. Pakul jość tolki rasijskaja viersija. Da kanca hoda, miarkujecca, źjavicca i biełaruskamoŭnaja. Internet-staronku robić dačka Kastusia Tarasava Hanna.
Na staroncy piśmieńnika raźmieščany jahonyja tvory, fotazdymki. Kastuś Tarasaŭ, jaki ŭ žyćci nie lubiŭ publičnych vystupleńniaŭ, byŭ takim samotnikam, na zdymkach paŭstaje inšym čałaviekam. Na adpačynku za miažoj, ź siamjoj, navat na mitynhach.
Archiŭ piśmieńnika ciapier znachodzicca ŭ Hanny. Jana jašče nie skončyła jaho raźbirać. Ale ŭžo siońnia moža skazać pra niepublikavanyja tvory.
«Dumaju, tam niama nieviadomych niedrukavanych apovieściaŭ. Baćka niejak ŭ liście ŭsie svaje hałoŭnyja tvory pieraličyŭ. Jość adzin nieapublikavany apovied (ruskaja i biełaruskaja viersii), artykuły na raznastajnyja temy, zbornik litaraturna-histaryčnych narysaŭ «Istoričieskij piejzaž». Jość pierakłady na biełaruskuju movu niekalkich apovieściaŭ, jakija pisaŭ pa-rusku. Taksama, darečy, i biełaruskuju «Pahoniu na Hrunvald» jon pierapisaŭ».
Pa novym varyjajecie ramana ciapier rychtujecca aŭdyjokniha.
***
Kastuś Tarasaŭ naradziŭsia ŭ Minsku 10 kastryčnika 1940 h. u siamji słužačych. Pa skančeńni siaredniaj škoły pracavaŭ ślesaram zborščykam na Minskim miechaničnym zavodzie. Skončyŭ Biełaruski palitechničny instytut (1965), pracavaŭ u Paŭnočna zachodniaj hieałahičnaj ekśpiedycyi. Potym u vydaviectvie «Vyšejšaja škoła», na kinastudyi «Biełaruśfilm», časopisie «Nioman», haziecie «Litaratura i mastactva», časopisie «Spadčyna», haziecie «Svaboda».
Tarasaŭ drukavaŭsia ad 1966 hoda. Aŭtar histaryčnych apovieściej pra minułaje Biełarusi: «Dzień raśsiejańnia» (pra Hrunvaldskuju bitvu, 1980), «Pahonia na Hrunvald», ramana «Try žyćci kniahini Rahniedy». Aŭtar kultavaha ŭ 1980 ja — pieršaj pałovie 1990 ch zbornika «Pamiać pra lehiendy».
Pamior 20 sakavika 2010.
