Upraŭleńnie Śledčaha kamiteta pa Homielskaj vobłaści raskryła zakaznoje zabojstva. Paśla pažaru ŭ Homieli 3 śniežnia pa Laščynskim prajeździe ŭ pryvatnym domie byli znojdzieny trupy45-hadovaha pradprymalnika i jaho staroj maci. Vyśvietliłasia, što jany zahinuli nie padčas pažaru, a byli zabityja.
Jak paviedamiŭ namieśnik načalnika ŭpraŭleńnia śledčaha kamiteta pa Homielskaj vobłaści Juryj Dziamjančyk, biźniesmien zajmaŭsia prakatam aŭtamabilaŭ, u jaho ŭłasnaści znachodziłasia šeść darahich inšamarak. Mužčyna byŭ u razvodzie z žonkaj i žyŭ razam z maci.
A20-hadovy biespracoŭny syn kamiersanta časova pražyvaŭ u Branskaj vobłaści Rasii, časta byvaŭ u Homieli. Małady čałaviek byŭ dydžejem i ładziŭ viečarynki, u tym liku ŭ homielskich kłubach.
Chłopiec kanfliktavaŭ z baćkam
U adnu z načej u kancy listapada pryjaciel dydžeja prakraŭsia ŭ dom biźniesmiena, adčyniŭšy dźviery klučami jaho syna.
Pradprymalnik pračnuŭsia i sprabavaŭ zmahacca z zabojcam, ale pry dapamozie małatka i inšych srodkaŭ małady čałaviek zabiŭ mužčynu i jaho maci.Trupy schavaŭ u bahažniku aŭtamabila, jaki stajaŭ u dvary doma.
Svajakoŭ u siamji ŭ Homieli nie było, tamu hibiel biźniesmiena i jaho maci nichto nie zaŭvažyŭ.
Na praciahu niekalkich dzion vykanaŭca zabojstva zachodziŭ u dom da svaich achviar i kraŭ ich rečy.Praź dziesiać dzion paśla zabojstva pieranios trupy nazad u dom i padpaliŭ jaho, sprabujučy insceniravać pažar.
Pieršym supracoŭniki pravaachoŭnych orhanaŭ zatrymali zamoŭcu zabojstva, a paśla i vykanaŭcu, jaki ŭžo pryznaŭsia va ŭčynienym. Syn ža pradprymalnika pakul nie pryznaje svaju vinu. Tym nie mienš jon prachodzić pa spravie jak saŭdzielnik zabojstva. Śledstva praciahvajecca.