Dabudavać 5-zorkavy hatel u centry Minska nie dajuć sankcyi
BELPOL śćviardžaje, što maje ŭ svaim rasparadžeńni dakumient, jaki śviedčyć pra efiektyŭnaść sankcyj.
Niedabudavany hatel. Fota: Realt
Materyjał tyčycca budaŭnictva 5-zorkavaha haściničnaha kompleksu, dziela jakoha źnieśli šklany paviljon «Biełeskpa».
«U žniŭni 2015 hoda Łukašenka vydaŭ ukaz №348-dsp «Ab budaŭnictvie šmatfunkcyjanalnaha haściničnaha kompleksu ŭ Minsku». Pavodle jaho pałažeńniaŭ, kampanii z AAE: inviestar — «Kopaonik Property Investment LLC» i zakazčyk — TAA «KPY Development» u termin da 31.12.2023 musili pabudavać 5-zorkavy haściničny kompleks u h. Minsku ŭ miežach vuł. M.Bahdanoviča — Ja. Kupały — r. Śvisłač», — havorycca ŭ materyjale.
«Adnak budaŭnictva abjekta nie zavieršana na siońniašni dzień. Za hety čas praviedziena rekanstrukcyja histaryčnych budynkaŭ, u jakich adkryty bucik-apart-hatel «The Basilian Minsk, Curio Collection by Hilton» pad kiravańniem apieratara «Hilton», uźviedzieny piešachodny most nad rakoj Śvisłač. Heta druhaja i treciaja čarhi budaŭnictva. Ale raboty nad pieršym etapam prajekta — hałoŭnym 5-zorkavym hatelem — jašče praciahvajucca», — adznačajuć u BELPOL.
Pavodle aŭtaraŭ, inviestar tłumačyć niesvoječasovuju realizacyju prajektu dvuma faktarami:
- niehatyŭny ŭpłyŭ sankcyjnaha cisku na Respubliku Biełaruś u 2022-2023 hadach z boku «niedružalubnych dziaržaŭ» u častcy abmiežavańniaŭ (zabarony) na ŭvoz u Biełaruś materyjałaŭ i abstalavańnia, što pryviało da pavieličeńnia terminaŭ ich vytvorčaści i pastaŭki;
- nieabchodnaściu inviestara, zakazčyka i hienpadradčyka vymušana rekanstrujavać finansavańnie i ŭsie raźliki pa prajekcie z dołaraŭ ZŠA na jeŭra, a taksama šukać alternatyŭnyja varyjanty apłaty zamiežnym pastaŭščykam u suviazi sa spynieńniem płaciažoŭ u dołarach ZŠA, a taksama admova šerahu zamiežnych bankaŭ pracavać z Respublikaj Biełaruś.
Rendar prajekta budučaha hatela.
Aŭtary śćviardžajuć, što ŭ suviazi z hetym novaj redakcyjaj ukaza płanujecca padoŭžyć termin realizacyi prajekta da kanca 2024 hoda.
Vydańnie REFORM.news źviartaje ŭvahu, što 26 krasavika 2024 hoda administracyja Centralnaha rajona horada paviedamiła, što budaŭnictva płanujecca zaviaršyć u druhim paŭhodździ. Pra heta išła razmova na sustrečy namieśnika kiraŭnika administracyi Siarhieja Utlika z pradstaŭnikami zabudoŭščyka, padradčyka i prajekciroŭščyka, pisała BiełTA.
«Na naradzie byli zasłuchany dakłady i prapanovy, a taksama ŭzhodnieny dalejšyja dziejańni pradstaŭnikoŭ kampanii-zabudoŭščyka, subpadradnaj arhanizacyi i prajektnaj arhanizacyi dla jak maha chutčejšaha zaviaršeńnia budaŭnictva», — adznačyli ŭ administracyi, zapeŭniŭšy, što raboty iduć na dobry temp.
Čytajcie taksama:
Jeŭrasajuz rychtuje bolš surovyja sankcyi suprać Biełarusi, ale dla kaliju mohuć zrabić vyklučeńnie
Zabudoŭščyk «Paŭnočnaha bieraha» paviedamiŭ, što budzie z prajektam paśla źmieny inviestara
