Što čyścić vušy lepš za vušnyja pałački?
Čym mohuć być škodnyja vatnyja pałački i jakija jość im biaśpiečnyja i efiektyŭnyja alternatyvy? Sabrali parady śpiecyjalistaŭ.
Supracoŭnik Słužby nacyjanalnych parkaŭ čyścić vucha statui Linkalna. Fota: Bettmann / Getty Images
Pieršaje, što treba razumieć, kali vas turbuje prablema najaŭnaści siery ŭ vušach, — hetaje rečyva nie vorah, jakoha treba likvidavać.
Vušnaja siera składajecca ź białkoŭ, tłuščaŭ, svabodnych tłustych kisłot, minieralnych solaŭ. Jana słužyć dla ačystki i zmazki słychavych kanałaŭ, a taksama abaraniaje ŭnutranaje vucha ad bakteryj, hrybkoŭ i nasiakomych.
Vušnaja siera taksama rehuluje vilhotnaść unutry vucha i dapamahaje vydalać źmiarćviełyja kletki skury, jakija nazapašvajucca va ŭnutranym vuchu. U vonkavym vuchu kala 2000 siernych załoz, jakija vypracoŭvajuć 12-20 mh vušnoj siery ŭ miesiac.
Słychavy prachod pavinien mieć dastatkovuju kolkaść vušnoj siery. Zvyčajna jaje liški pieramiaščajucca vonki z hłybini vušnoha kanału pry žavańni i razmovie. Takim čynam słychavy prachod samaačyščajecca ad lišku vušnoj siery.
U normie nijakich dapamožnych dziejańniaŭ dla vydaleńnia siery, tak zvanaj čystki słychavych prachodaŭ, nie patrabujecca.
Fota: Getty Images
Čym niebiaśpiečnyja vatnyja pałački
Śpiecyjalisty źviartajuć uvahu, što vykarystoŭvajučy vatnyja pałački dla vydaleńnia vušnoj siery my ryzykujem vyklikać razdražnieńnie skury ŭnutranaha vucha. Vałokny vatnych tamponaŭ, jakija na pieršy pohlad padajucca «miakkimi i pušystymi» na samoj spravie vielmi abraziŭnyja. Paśla ich intensiŭnaha vykarystańnie skura moža być paškodžanaja, što pryviadzie da bolš intensiŭnaha vypracoŭvańnia siery z metaj abarony razdražnieńnia.
Druhaja akaličnaść, pra jakuju treba viedać, — vatnyja tampony mohuć prapchnuć vušnuju sieru hłybiej u vušny kanał. Heta pryviadzie da jaje nazapašvańnia i ŭ vyniku vykliča śvierb, bol, pačućcio zakładzienaści ci hałavakružeńnia. Pry paharšeńni situacyi možna častkova stracić vastryniu słychu.
Tamu śpiecyjalisty rajać pry najaŭnaści takich simptomaŭ nie imknucca samomu čyścić vušy, a źviarnucca da śpiecyjalista.
Alternatyvy vušnym pałačkam
U aptekach možna ŭbačyć vušnyja śviečki, jakija ŭjaŭlajuć saboj połuju trubku z tkaniny, nasyčanuju pčalinym voskam. Adpaviedna instrukcyi jaje ŭstaŭlajuć u słychavy prachod i padpalvajuć. Śćviardžajecca, što pad čas hareńnia ŭnutry vušnoj trubki panižajecca cisk pavietra, što spryjaje vychadu vušnoj siery vonki.
Ale śpiecyjalisty nie rajać vykarystoŭvać hety sposab. Nijakaha pierapadu cisku padčas hareńnia nie adbyvajecca, a raspłaŭleny vosk moža trapić u słychavy prachod, što pavialičvaje ryzyku parušeńnia słychu.
Adnym z raspaŭsiudžanych sposabaŭ vydaleńnia vušnoj siery źjaŭlajecca vykarystańnie pierakisu vadarodu. Ale śpiecyjalisty rekamiendujuć i im nie złoŭžyvać. Pierakis moža spravakavać razdražnieńnie ŭnutranaha vucha, a taksama pryvieści da takich niepažadanych efiektaŭ, jak zapaleńnie ŭnutranaha vucha i bol u vušach.
Ni ŭ jakim razie nielha vykarystoŭvać viazalnyja prutki ci kručki, kancylarskija saščepki, špilki. Lubyja pradmiety, jakija pa svaim pamiery mohuć źmiaścicca ŭ słychavym prachodzie i być vykarystanyja zamiest svajho pramoha pryznačeńnia dla čystki vucha, pryniasuć tolki škodu, bo mohuć traŭmavać vucha ci zanieści infiekcyju.
Ekśpierty śćviardžajuć, što najlepšy sposab zachavać vušy zdarovymi i čystymi — nie čapać vušnuju sieru. Ale kali vy nie možacie strymacca pierad žadańniem u ich pakałupacca (što apraŭdana, bo vucha pakrytaje niervovymi kančatkami, jakija pry stymulacyi mohuć vyklikać pryjemnyja pačućci), to ekśpierty majuć niekalki paradaŭ.
U bolšaści vypadkaŭ, adznačajuć śpiecyjalisty, arhanizm sam vypichvaje reštki siery, jakaja nazapašvajecca, vonki. Tamu dla taho, kab jaje prybrać, dastatkova pramyć vušnuju rakavinu mylnym rastvoram z dapamohaj zvyčajnaj mačałki, jakoj myjucca inšyja častki cieła. Ale myć treba tolki źniešniuju častku, nie imknučysia dabracca hłybiej.
Ekśpierty taksama źviartajuć uvahu na vykarystańnie kroplaŭ dla vušej. Jany bolš padychodziać tym ludziam, u kaho vušnaja siera ad pryrody bolš suchaja. Kropli jaje zrobiać bolš miakkaj i palehčać ačystku.
Kali ž vy pa niejkich pryčynach ličycie, što vatnyja pałački samy efiektyŭny sposab ačystki vušej, to karystajciesia imi aściarožna. Hałoŭnaje — nie imkniciesia ich prasunuć hłyboka ŭ vucha. Dastatkova budzie sabrać sieru vakoł vušnoj adtuliny.
Kali ž vušy balać, śviarbiać ci padajucca zakładzienymi, to śpiecyjalisty rajać źviarnucca da doktara, jaki moža dyjahnastavać pryčynu i pravieści nieabchodnyja pracedury.
Čytajcie taksama:
Zatyčki ŭ vušy i śvistok fihurujuć u jakaści dokazu ŭdziełu žančyny ŭ demanstracyi
Łukašenka siońnia pažartavaŭ pra vušy
