Urad Partuhalii admoviŭsia płacić reparacyi za kałanijalnaje minułaje
Da hetaha zaklikaŭ prezident krainy.
Marsełu Rebiełu de Soŭza prymaje parad z nahody 50-hodździa «Revalucyi hvaździkoŭ». Fota: Armando Franca / AP
Urad Partuhalii zajaviŭ, što nie płanuje płacić reparacyi za kałanijalnaje minułaje krainy i jaje aktyŭny ŭdzieł u handli rabami. Dyskusija pra historyju razharełasia ŭ Partuhalii paśla taho, jak prezident krainy Marsełu Rebiełu de Soŭza prapanavaŭ uładam zapłacić za złačynstvy minułaha, piša Bi-bi-si.
Rebiełu de Soŭza zhadaŭ pra nieabchodnaść takich kampiensacyj na minułym tydni, padčas razmovy z žurnalistami zamiežnych ŚMI. Jaho spytali, ci naležać reparacyi naščadkam ludziej, jakich partuhalcy kaliści vyvieźli z Afryki, u asnoŭnym u Braziliju, i vykarystoŭvali ŭ jakaści raboŭ na płantacyjach.
Adkazvajučy na hetaje pytańnie, prezident prama nie kazaŭ pra rabstva, ale skazaŭ, što Partuhalija pavinna «całkam pryznać adkaznaść» za złačynstvy minułaha, u tym liku za masavyja zabojstvy i rabavańni padčas kałanizacyi. Pry hetym Rebiełu de Soŭza zaŭvažyŭ, što jahonaja kraina mahła b «za heta zapłacić».
Paźniej jon patłumačyŭ, što, na jaho dumku, Partuhalija moža kampiensavać kałanijalnyja złačynstvy šlacham prabačeńnia daŭhoŭ i vydzialeńnia dapamohi na raźvićcio paciarpiełych dziaržaŭ. Pa słovach Rebiełu de Soŭzy, takim čynam Partuhalija zdolnaja paźbiehnuć losu «inšych krain, jakija… stracili zdolnaść da dyjałohu i razumieńnia sa svaimi byłymi kałonijami».
U adkaz pravacentryscki ŭrad krainy (dzie daminuje partyja, lidaram jakoj u minułym byŭ prezident), zajaviŭ, što padobnych płanaŭ u jaho niama i ŭ pytańni reparacyj jon «idzie toj ža linii», što jaho papiaredniki. «Dla jakich-niebudź kankretnych dziejańniaŭ pa hetym pytańni nie było i niama nijakich pracesaŭ abo prahram», — adznačyli ŭ kabiniecie.
Pry hetym vielmi pravaja partyja Chega (jakaja na niadaŭnich parłamienckich vybarach u čatyry razy pavialičyła kolkaść svaich deputataŭ) maje namier zaklikać parłamient pryniać śpiecyjalnuju rezalucyju z asudžeńniem słoŭ prezidenta. Na dumku hetaj palityčnaj siły, hetyja zajavy « biez sumnievu źjaŭlajucca zdradaj partuhalskamu narodu i jaho historyi».
Da hetaha ministr rasavaj roŭnaści Brazilii Aniel Franku zapatrabavała ad Partuhalii» kankretnych dziejańniaŭ «u paćvierdžańnie słoŭ prezidenta.
Ale 25 krasavika, padčas śviatkavańnia 50-hodździa «Revalucyi hvaździkoŭ», Rebiełu de Soŭza ničoha nie kazaŭ pra mahčymyja reparacyi.
Pry hetym u cyrymonii brali ŭdzieł prezidenty krain, jakija ŭ minułym byli kałonijami Partuhalii i zmahli atrymać niezaležnaść paśla zakančeńnia dyktatury. U svaich vystupach jany kazali pra revalucyju jak pra simvał svabody, ale ni adzin ź ich pra reparacyi nie zhadaŭ.
Ministr kultury ŭ papiarednim sacyjalistyčnym uradzie krainy prapanoŭvaŭ viarnuć vyviezienyja z kałonij kaštoŭnaści. Hetuju ideju ŭ minułym padtrymlivaŭ i ciapierašni kiraŭnik Ministerstva kultury, jaki taksama pracavaŭ dyrektaram Nacyjanalnaha muzieja, dzie zachoŭvajucca mnohija pradmiety, pryviezienyja kałanizatarami.
U razmovie z zamiežnymi karespandentami prezident krainy nahadaŭ, što ŭ časy dyktatury jaho baćka byŭ hubiernataram Mazambika i apošnim u historyi ministram kałonij. Tamu ciapierašni kiraŭnik dziaržavy jak nichto inšy moža piarečyć tym, chto aceńvaje kałanijalnaje minułaje Partuhalii ŭ pazityŭnym klučy.
Čytajcie taksama: