U Daniecku źnik kamunist z ZŠA, jaki z 2014-ha vajavaŭ na baku Rasii. Jaho žonka kaža, što jaho «vykrali ruskija»
Raseł Bentli byŭ u zachapleńni ad Pucina i pryjechaŭ vajavać na baku Rasii. Adnak tydzień tamu jaho brutalna zatrymali rasijskija vajskoŭcy, a paśla jon źnik.
Raseł Boner Bentli III. Fota ź jahonaj staronki «Ukantakcie»
Źnikłamu Bentli pa mianušcy «Techas» 63 hady. Raseł rodam sa štata Techas. Zhodna z infarmacyjaj ź miedyja, u maładości jon try hady prasłužyŭ u amierykanskaj armii.
Mužčyna pachodzić z zamožnaj siamji, ale va ŭzroście kala 30 hadoŭ razyšoŭsia ź blizkimi praz kamunistyčnyja pohlady. Taksama ŭ minułym jon byŭ aktyvistam, jaki ahitavaŭ za lehalizacyju marychuany, jakoj handlavaŭ, za što atrymaŭ piać hadoŭ turmy.
Paśla pieršaha ŭvarvańnia Rasii va Ukrainu, mužčyna, natchniony kamunistyčnaj ahitacyjaj pra «narodnyja respubliki» i «nacysckuju Ukrainu», pajechaŭ u Danieck. Jon pačaŭ vajavać u bataljonie «Uschod», jakim kiravaŭ pierabiežčyk z SBU Alaksandr Chadakoŭski. Udzielničaŭ u bajach za Daniecki aeraport.
Raseł Bentli (krajni z pravaha boku) padčas bajoŭ za Daniecki aeraport. Fota ź jahonaj staroncy «Ukantakcie»
Atrymaŭ jon i šerah uznaharodaŭ. A taksama pamianiaŭ hramadzianstva ZŠA na hramadzianstva «DNR».
Bentli — «jastrab» vajny, jaki ahituje za toje, što z Ukrainaj nielha vieści pieramovy, a Kijeŭ treba zachapić vajennym šlacham. Jon ahitavaŭ za ŭvarvańnie va Ukrainu jašče da 24 lutaha 2024-ha. Taksama Raseł zaciata chvalić Pucina, Pryhožyna i Łukašenku.
Dyfiramby
Biełaruś jon ahituje trymacca Rasii.
Radaść ad «jadnańnia Biełarusi i Rasii». Skrynšot sa staronki «Techasa» va «Ukantakcie»
Praŭda, nie z usim u palitycy RF jon zhodny. Naprykład, jon krytykavaŭ ułady za abaviazkovuju vakcynacyju ad kavida, a ŭ śmierci Pryhožyna abvinavaciŭ «zdradnikaŭ unutry Rasii».
Raseł u svaich dopisach krytykuje ŭsich, akramia Pucina. Nahadajem, što Pucin tak i nie «adšukaŭ» zabojcaŭ Pryhožyna. Skrynšoty ź jahonaj staronki «Ukantakcie»
Pad čas čarhovaha «prylotu» pa Daniecku 8 krasavika jon pajechaŭ pahladzieć na jaho nastupstvy. I źnik. Spačatku było niezrazumieła, što adbyłosia.
Ale žonka mužčyny vyśvietliła abstaviny źniknieńnia. Vyjaviłasia, što jaho brutalna zatrymali rasijskija vajskoŭcy z 5-j asobnaj hvardziejskaj tankavaj bryhady, raźbiŭšy jamu mašynu.
Spačatku žoncy skazali, što jon «zdymaŭ techniku dla USU», ale tyja, z kim raniej vajavaŭ Raseł, adšukali jahony telefon i vyśvietlili, što jon u hety dzień ničoha nie zdymaŭ.
Raseła Bentli z taho času nichto nie bačyŭ.
Raseł Bentli prymaje hramadzianstva «DNR». Fota ź jahonaj staronki «Ukantakcie»
Paviedamleńnie pra jaho zatrymańnie źjaviłasia ŭ telehram-kanale «Čornaja kniha kapitalizma». Tam pišacca, što «Techas byŭ apazicyjanieram, krytykavaŭ Adzinuju Rasiju i kiroŭnuju sistemu». Zhodna z dopisam, Raseł byŭ
«niazhodny z uładami za zapoźnienaje pryznańnie t. zv. ŁDNR, raspyleńnie hieahrafii, metaŭ i srodkaŭ tak zvanaj SVA ŭ impieryjalistyčnych intaresach bujnoha kapitała i dla zadavalnieńnia vialikadziaržaŭnickich ambicyjaŭ elitaŭ».
Aŭtary dopisu miarkujuć, što zatrymańnie mahło stać pomstaj za niazručnuju pazicyju i «kamunizm».
«Naša Niva» — bastyjon biełaruščyny
PADTRYMAĆČytajcie taksama:
Instruktar «Vahniera» z pazyŭnym «Brest»: Biełaruś — taki ž kirunak, jak i inšyja. A my spatrebimsia pierad vybarami
