Kiroŭca, jaki źbiŭ na mašynie naśmierć u Maskvie paeta Lva Rubinštejna, atrymaŭ umoŭny termin
63-hadovaha mužčynu sudzili pa abvinavačańni ŭ parušeńni praviłaŭ darožnaha ruchu.
Leŭ Rubinštejn. Fota: Natalia Senatorova / wikipedia.org
Mužčynu, jaki 8 studzienia źbiŭ na pierachodzie ŭ Maskvie paeta Lva Rubinštejna, pryhavaryli da hoda i vaśmi miesiacaŭ umoŭna, paviedamlaje prakuratura Maskvy. Proźviščy ŭ paviedamleńni nie paznačany, piša Bi-bi-si.
63-hadovaha mužčynu sudzili pa abvinavačańni ŭ parušeńni praviłaŭ darožnaha ruchu, jaki paciahnuŭ pa nieaściarožnaści śmierć čałavieka (č. 3 art. 264 KK RF).
«Abvinavačany, kirujučy aŭtamabilem «Falksvahien Holf», ruchaŭsia pa vuł. Abrazcova, dzie na nierehulujemym piešachodnym pierachodzie nie sastupiŭ darohu mužčynie, jaki pierachodziŭ prajeznuju častku, źbiŭšy jaho, — havaryłasia ŭ papiarednim pres-relizie prakuratury. — 76-hadovy paciarpieły byŭ špitalizavany ŭ ciažkim stanie ŭ miedycynskuju ŭstanovu, dzie paśla pamior».
76-hadovy paet i eseist pamior u maskoŭskaj balnicy 14 studzienia.
Rubinštejn naraŭnie z Usievaładam Niakrasavym i Dźmitryjem Pryhavym — adzin z zasnavalnikaŭ maskoŭskaha kanceptualizmu. Litaraturaj Rubinštejn zajmaŭsia z kanca 1960-ch hadoŭ, u pačatku 1970-ch pačaŭ raspracoŭvać ułasnuju stylistyku minimalizmu.
Pad upłyvam pracy ź biblijatečnymi kartkami, ź siaredziny 1970-ch hadoŭ stvaryŭ ułasny žanr «Kartateki», jaki ŭźnik na styku vierbalnaha, vyjaŭlenčaha i pierfarmatyŭnaha mastactva.
U vieraśni 2020 hoda padpisaŭ list u padtrymku pratesnych akcyj u Biełarusi. U sakaviku 2022 hoda padpisaŭ adkryty list, jaki asudžaje rasijskaje ŭvarvańnie va Ukrainu.
Čytajcie taksama:
