U Mahilovie chočuć nazvać praśpiekt u honar Adzinstva. Nad nazvaj dumali niekalki hadoŭ
Siońnia praśpiekt simvalična viadzie ŭ nikudy.
Pakul bieznazoŭny praśpiekt u Mahilovie złučaje centr horada z bujnymi spalnikami. Fota: SB. Biełaruś siehodnia
Vykazacca nakont novaj nazvy prapanuje Mahiloŭski harvykankam.
Nazvu «praśpiekt Adzinstva» (pa-rusku «prośpiekt Jedinstva») prapanujuć prysvoić častkova pabudanavamu praśpiektu, raźmieščanamu ŭ miežach vulic Kasmanaŭtaŭ, Alaksieja Pysina, Białynickaha-Biruli i Ciški Hartnaha.
Praśpiekt pačali budavać u pačatku 2020 hoda jak darohu-dublor praśpiekta Miru, vulicy Jakuboŭskaha, Zaharadnaj i Minskaj šašy, jakija pieraciakali adno ŭ adno i źjaŭlalisia adzinaj suviaźziu pamiž centram horada i vialikimi žyłymi rajonami — «Mir», «Spadarožnik», «Kazimiraŭka», adrezanych čyhunkaj. Hetaja ž daroha źviazvała horad sa stalicaj. Praz heta ŭ horadzie zaŭsiody była davoli składanaja transpartnaja situacyja.
Dublor pačali budavać za 2 km na poŭdzień ad staroj trasy. Pad jaho źnieśli značnuju častku domabudaŭničaha kambinata, haražnaha kaapieratyva. Nad čyhunačnymi linijami pabudavali składanyja raźviazki, kab złučyć z novym praśpiektam usie razroźnienyja raniej rajony, u tym liku Jamnicki pasiołak i pryharadnuju viosku Haradščynu.
Pieršaja čarha dublora, adkrytaja ŭ 2021 hodzie. Fota: SB. Biełaruś siehodnia
Pieršuju čarhu dublor ź vialikaj pompaj adkryli jašče 17 vieraśnia 2021 hoda, u dzień hadaviny ŭźjadnańnia Uschodniaj i Zachodniaj Biełarusi, jaki byŭ abvieščany łukašystami «Dniom narodnaha adzinstva».
Tady vystupiŭ staršynia Mahiloŭskaha abłvykankama Leanid Zajac, jaki prapanavaŭ nazvać novy praśpiekt imiem 17 Vieraśnia. Ale ŭžo ŭ śniežni taho ž hoda Zajca zabrali nazad u Minsk z hanarovaj mahiloŭskaj ssyłki, i, vidać, na papieru pieranieści ideju nie paśpieli.
Adkryćcio čynoŭnikami dublora ŭ 2021 hodzie. Fota: SB. Biełaruś siehodnia
Ale voś płošču pierad harvykankamam paśpieli za dva dni da novaha dziaržaŭnaha śviata pierajmienavać u płošču Adzinstva i pastavić ścipły znak.
Nazva, prapanavanaja Zajcam, adnak, zamacavałasia za dubloram. Praśpiekt 17 Vieraśnia byŭ naniesieny na ŭsie karty, na nazvu spasyłalisia abłasnyja ŭłady, vyznačajučy miežy vybarčych akruh dla niadaŭnich miascovych vybaraŭ.
Tupikovy praśpiekt 17 Vieraśnia na «Jandeks.Kartach»
U vieraśni 2023 hoda zdali druhuju čarhu dublora. Kiraŭnik Administracyi Łukašenki Ihar Sierhiejenka da ździŭleńnia ŭsich prysutnych vykazaŭ spadziavańnie, što da nastupnaj hadaviny dublor budzie zavieršany i «zdabudzie svaju nazvu, nie vyklučana, što źviazanuju z dataj 17 vieraśnia».
Spatrebiłasia jašče paŭhoda, kab miascovyja ŭłady prydumali niejkuju nazvu, źviazanuju z 17 vieraśnia. Vybar byŭ nievialikim, spynilisia na Adzinstvie.
Druhaja čarha dublora, zdadzienaja ŭ 2023 hodzie. Fota: magilev.by
Mahčyma na takuju marudnaść upłyvaŭ toj fakt, što siońnia praśpiekt niepryhoža abryvajecca tupikom pasiarod pryvatnaha siektara, to-bok litaralna viadzie ŭ nikudy. Ideołaham mahli nie spadabacca takija paraleli.
Ciapier nakont hetaha vybaru miascovych uładaŭ prapanujuć vykazacca mahiloŭcam.
Abmierkavańnie praciahniecca z 10 pa 24 krasavika 2024 h. Svaje mierkavańni i prapanovy pa hetym pytańni možna nakiravać na adras ustanovy «Redakcyja haziety «Vieśnik Mahilova»: 212030, h. Mahiloŭ, vuł. Pieršamajskaja, 89, e-mail: [email protected] z pamietkaj «Vyvučeńnie mierkavańnia».
Varta zaŭvažyć, što takaja nazva ŭžo prysvojena płoščy, ź jakoj praśpiekt nijak nie źviazany, što stvaraje niepatrebnuju błytaninu. Čamu nie zachacieli nazvać u honar 17 Vieraśnia taksama zrazumieła: pa ciapierašnich praviłach pa-rusku praśpiekt nazyvaŭsia b «17 Vierieśnia».
Cikava, što historyja z najmieńniem praśpiekta ŭ Mahilovie pakazvaje na kulturnuju i ideałahičnuju «haleču» biełaruskaj sistemy. Praśpiekt u Mahilovie, adna z hałoŭnych mahistralaŭ horada, niachaj i nie zavieršanaja, isnuje ŭžo nie pieršy hod biez nazvy.
U absalutnaj bolšaści vypadkaŭ nazvy novym vulicam i praśpiektam prysvojvajucca jašče na stadyi, kali jany tolki prajektujecca. Ale siońnia biełaruski nacyjanalny panteon dla čynoŭnikaŭ čužy i niebiaśpiečny, a ŭ svaim nikoha vartaha cełaha praśpiekta paprostu niama.
Zastajucca tolki abstrakcyi kštałtu «Niezaležnaści» i «Adzinstva».
Čytajcie taksama:
Bondarava ašaleła. «Nam skažuć, što heta narodny vybar. Vybaru naroda niama!»
U Babrujsku vulicu dumali nazvać u honar słavackaha horada, ale vyrašyli «aktualna»
«Zvarotaŭ usio bolš». Hihin anansavaŭ pierajmienavańnie vulicy Kalinoŭskaha ŭ Minsku
https://d367rzjs5oyeba.cloudfront.net/340329