Biełaruskija marksisty stvaryli trynaccać rehijanalnych jačejek
Arhanizacyjny kamitet pa stvareńni ŭ Biełarusi levaj demakratyčnaj partyi marksisckaj skiravanaści 4 krasavika «zaćvierdziŭ stvareńnie jašče trynaccaci rehijanalnych adździaleńniaŭ arhkamiteta», piša «Pozirk».
Karł Marks. Ilustracyjnaje fota
Pavodle paviedamleńnia ŭ fejsbuku adnaho z sustaršyniaŭ arhkamiteta Siarhieja Vaźniaka, za asnovu pryniatyja prajekty dakumientaŭ arhkamiteta, źviazanych ź finansavym zabieśpiačeńniem jaho dziejnaści. Čakajecca, što «asnovaj finansavańnia buduć ustupnyja ŭnioski hramadzian, jakija dałučajucca da pracy arhkamiteta, i dobraachvotnyja achviaravańni».
Prajekty nakiravanyja na trochtydniovaje abmierkavańnie ŭ rehijanalnyja adździaleńni arhkamiteta. Pryniać ich płanujecca ŭ kancy krasavika, paviedamiŭ Vaźniak. Da pačatku traŭnia arhkamitet źbirajecca padrychtavać prajekt prahramy novaj partyi, paśla čaho «pačniecca jaje publičnaje abmierkavańnie».
«Praca idzie krok za krokam, — napisaŭ palityk. — Vykarystoŭvajem tyja lehalnyja mahčymaści, jakija daje novaja redakcyja zakona «Ab palityčnych partyjach»… Sioje-toje važnaje ŭžo zroblena».
Arhkamitet pierakanany, što Biełarusi «patrebnaja levaja demakratyčnaja partyja, jakaja staić na idejnaj płatformie marksizmu». Pavodle infarmacyi krynic «Pozirka», u adnym z raździełaŭ prahramy raspracoŭščyki «pasprabujuć vykłaści svoj pohlad na marksisckuju teoryju ŭ kantekście sučasnaha śvietu i sučasnaj Biełarusi».
9 śniežnia 2023 hoda paviedamlałasia, što ŭ Minsku sfarmiravany arhkamitet pa stvareńni levaj demakratyčnaj partyi, bazavaj ideałohijaj jakoj budzie marksizm.
Arhkamitet uznačalili try palityki: Siarhiej Kalakin — były lidar likvidavanaj 29 vieraśnia Viarchoŭnym sudom Biełaruskaj partyi levych «Spraviadlivy śviet», Siarhiej Vaźniak — eks-siabra CK «Spraviadlivaha śvietu», i Alaksandr Buchvostaŭ — były staršynia likvidavanaj 2 žniŭnia 2004 hoda Biełaruskaj partyi pracy.
Členy likvidavanaha «Spraviadlivaha śvietu» mieli namier stvaryć novy palityčny ruch, jaki budzie adstojvać «demakratyčny i sacyjalistyčny šlach raźvićcia dziaržavy i hramadstva».
Čytajcie taksama:
Arhkamitet marksisckaj partyi abviaściŭ pra stvareńnie jačejek u Minsku
Buchvostaŭ, Vaźniak i Kalakin pasprabujuć stvaryć novuju partyju na bazie marksizmu
