U Biełarusi mianiajecca zakon ab rekłamie. Da čaho rychtavacca błohieram i prostym karystalnikam sacsietak?
Z 12 lipienia ŭ Biełarusi źmienicca rekłamnaje zakanadaŭstva. Novaŭviadzieńni zakranuć błohieraŭ i prosta aktyŭnych karystalnikaŭ sacsietak. Vydańnie «Anłajnier» vyvučyła źmieny i traktoŭki składanych vypadkaŭ razam z advakatam, kab viedać, da čaho rychtavacca. Raźbiracca ŭ temie jamu dapamahała Iryna Kałuhina — advakatka ŭ halinie damoŭnaha, haspadarčaha, siamiejnaha prava.
Jak usio ŭładkavana ciapier?
U 2022 hodzie ŭ Biełarusi źjaviŭsia tak zvany rejestr rekłamaraspaŭsiudžvalnikaŭ. Ciapier u im pavinny być tyja, chto akazvaje rekłamnyja pasłuhi ŭ drukavanych ŚMI, na radyjo i telebačańni, a taksama ŭ internecie praź sietkavyja vydańni.
Rejestr vyhladaje jak tablica i raźmieščany ŭ adkrytym dostupie na sajcie Ministerstva antymanapolnaha rehulavańnia i handlu — heta ŭładalnik rejestra, ministerstva farmiruje i viadzie jaho.
Ciapier biez uklučeńnia ŭ rejestr možna davać u internecie rekłamu, nie źviazanuju z publikacyjaj u sietkavych vydańniach. Naprykład, błohierka vykładvaje storys sa śviežym manikiuram i acenkaj sałona pryhažości — joj nie treba być u rejestry. A voś kali sałon pryhažości zachoča kupić baniery na haradskim partale, jaki zarehistravany jak ŚMI (abo sietkavaje vydańnie), to partał pavinien być u śpisie.
U hetym prykładzie z manikiuram jość dva nievidavočnyja niuansy zakona.
1. Nielha rekłamavać «šerych» pradprymalnikaŭ — heta artykuł 10 zakona «Ab rekłamie». To-bok kali dziejnaść čałavieka padpadaje pad aznačeńnie pradprymalnictva, jon pavinien być zarehistravany jak IP ci jurydyčnaja asoba.
Toje ž samaje ź dziejnaściu pa licenzijach i atestatach. Naprykład, licenzujucca miedycynskija pasłuhi, praca advakataŭ, azdaraŭleńnie dziaciej za miažoj. Pa atestatach pracujuć, naprykład, aŭdytary.
Błohieram pierad publikacyjaj rekłamy treba praviarać usie hetyja dakumienty. I brend-mieniedžaram, jakija vybirajuć asoby brendaŭ dla rekłamy, taksama.
2. Usie ludzi, jakija trapili ŭ storys z hieapaznakaj, pavinny być zhodnyja na publikacyju. Inakš parušajucca ich kanstytucyjnyja pravy, i za heta mohuć navat pryciahnuć da kryminalnaj adkaznaści. Naprykład, pa artykule 203 KK Respubliki Biełaruś («Niezakonnyja dziejańni ŭ dačynieńni da infarmacyi ab pryvatnym žyćci i piersanalnych danych karajucca hramadskimi rabotami abo štrafam, abo aryštam, abo abmiežavańniem/pazbaŭleńniem voli na termin da dvuch hadoŭ»).
Hety niuans tyčycca nie tolki rekłamy ŭ błohieraŭ, ale i zvyčajnych pastoŭ.
Kali na sełfi z restarana traplaje hość za susiednim stolikam, to treba ci pytacca ŭ jaho zhodu pierad publikacyjaj, ci rabić fota, na jakim jaho nielha paznać.
Što źmianiajecca z 12 lipienia 2024 hoda?
Nabuduć moc źmieny ŭ zakon «Ab rekłamie», apublikavanyja 11 studzienia 2024 hoda. Zhodna ź imi, treba budzie ŭnosić u rejestr infarmacyju pra ŭsich, chto raźmiaščaje rekłamu ŭ luboj formie z dapamohaj lubych srodkaŭ u internecie (navat kali jany nie źjaŭlajucca ŚMI i nie zarehistravanyja jak sietkavyja vydańni).
Ludziam, jakija płanujuć zarablać na błohu, dajučy rekłamu, treba budzie zarehistravacca ŭ rejestry. Darečy, niekatoryja błohiery ŭ im užo jość. Naprykład, Ksienija Ivaška, u jakoj 127 tys. padpisčykaŭ u instahramie, i Julija Kabiakova z 48,6 tys. instafołavieraŭ.
Pry hetym rekłamaj z punktu hledžańnia zakanadaŭstva mohuć vyhladać i dziejańni, u jakich niama mety niešta pradać abo zarabić. Voś niekalki prykładaŭ.
Situacyja 1: błoh entuzijastaŭ
Dapuścim, siabry z Hrodna viaduć u instahramie nievialiki błoh na 3000 čałaviek pra novyja miescy ŭ horadzie. Akaŭnt stvorany ź lubovi da rodnaha horada, nie manietyzujecca, pra novyja ŭstanovy tut pišuć pa žadańni — heta nie typovyja adnosiny «rekłamadaviec — rekłamnaja placoŭka». Ci treba jamu być u rejestry?
«Možna skazać dakładna, što da 12.07.2024 heta było nie treba, a voś paśla rehistracyja patrabujecca, kali nie źjavicca novych tłumačeńniaŭ pa prymianieńni hetaha zakona», — raskazvaje Iryna Kałuhina.
Situacyja 2: Mastak adznačaje błohiera ŭ sacsietkach
Ujavim, što pačatkoviec-mastak maluje papularnaha błohiera i raźmiaščaje hety partret u siabie ŭ zapisie z adznakaj błohiera. Ci pavinien mastak rehistravacca ŭ rejestry?
«Kali zychodzić z normaŭ zakona «Ab rekłamie», dziejańni mastaka padpadajuć pad aznačeńnie «raspaŭsiud rekłamy». Znoŭ ža da 12 lipienia 2024 hoda mastaku być u rejestry nie treba, a z 12 lipienia — nieabchodna», — tłumačyć ekśpiertka.
Situacyja 3: kałabaracyja brendaŭ
Naprykład, kampanija vyrablaje pradukcyju i piša pra heta na svaim sajcie i ŭ sacsietkach. Jany abjadnalisia ź inšaj kampanijaj i vypuścili sumiesnuju kalekcyju. Ci pavinien tut chtości być u rejestry?
Pa słovach Iryny, dla zakanadaŭstva hetyja dziejańni vyhladajuć tak:
- Apublikavać artykuł pra svaju pradukcyju ŭ siabie na sajcie = raźmiaścić rekłamu ŭ internecie, kampanija ličycca rekłamadaŭcam.
- Apublikavać u siabie na sajcie artykuł pra pradukcyju inšaj kampanii = raspaŭsiudzić rekłamu, kampanija ličycca rekłamaraspaŭsiudžvalnikam i ŭžo ŭ hetym vypadku pavinna być u rejestry z 12 lipienia 2024 hoda.
A što budzie z tarhietam i hivami?
Adrazu ŭjaŭlajecca situacyja: čałaviek choča razyhrać knihu siarod svajoj nievialikaj aŭdytoryi, u asnoŭnym jakaja składajecca ź siabroŭ i znajomych, paprasiŭšy pra repost. Jak na takoje hladzić zakon?
Pa słovach Iryny, termina «hiŭ» u zakanadaŭstvie niama. Ale kali ŭličvać, što hiŭ pryznačany dla pryciahnieńnia ŭvahi i rostu padpisčykaŭ, to pa hetych prykmietach jaho možna adnieści da rekłamy.
Novuju redakcyju zakona MARH tłumačyć tak:
«Uvodzicca zabarona na akazańnie pasłuh pa raźmiaščeńni rekłamy ŭ internecie jurasobami i IP, nie ŭklučanymi ŭ rejestr».
Atrymlivajecca, što pry adkazie na pytańnie «Ci treba mnie być u rejestry?» spačatku nieabchodna zrazumieć:
- ci rablu ja toje, što padpadaje pad vyznačeńnie pradprymalnickaj dziejnaści (rekłamavańnie ličycca takoj);
- ci jość u mianie dla takoj dziejnaści IP ci jurydyčnaja asoba.
Jašče adzin nieadnaznačny instrumient sacsietak — tarhietavanaja rekłama. Zhodna z abnoŭlenym zakonam, toj, chto jaje zapuskaje, pavinien być zarehistravany ŭ rejestry. Ale byvajuć i niekamiercyjnyja situacyi vykarystańnia tarhietu.
Voś para prykładaŭ:
- Zoavałancior padbiraje z vulicy katoŭ i sabak. Kab chutčej ich prystrojvać, zapuskaje tarhietavanuju rekłamu. Hrošaj za vałanciorskuju dziejnaść jon nie atrymlivaje, naadvarot, układvaje svaje — na korm, vietkliniki i zapusk rekłamy.
- Chłopiec sumuje pa pakinuŭšym Biełaruś tyndary i choča zapuścić tarhiet na svaje fota, kab znajomicca ź dziaŭčatami.
Što tyčycca hetych situacyj, to ciapier niama adnaznačnych adkazaŭ, Ci možna budzie tak rabić paśla 12 lipienia biez rehistracyi ŭ rejestry? Zakon pakul nie ŭstupiŭ u siłu, jašče nie skłałasia pravaprymianialnaja praktyka, na jakuju zvyčajna abapirajucca advakaty.
Tłumačeńniaŭ ad MARH i Nacyjanalnaha centra pa abaronie piersanalnych dadzienych pakul nie tak šmat. Tamu kali ŭ vas nieadnaznačnaja situacyja, možna źviarnucca ŭ ministerstva z prośbaj patłumačyć, jak zakon budzie hladzieć na kankretny vypadak.
Čytajcie taksama:
U Biełarusi zabaroniać rekłamavać pracu i vučobu za miažoj
Dziaržaŭnamu TB źbirajucca dapamahčy zarabić — rekłamy stanie bolš, u tym liku pra ałkahol
