Znakamity trenier krytykuje kursy samaabarony i kaža, jak abaranicca ad hvałtu na vulicy
Vital Rak — viadomy biełaruski trenier pa karate, kiraŭnik kłuba «Vołat», jaki ciapier pracuje ŭ Polščy. Paśla zhvałtavańnia i zabojstva biełaruski Lizy ŭ Varšavie Rak vykłaŭ videa z razvahami pra toje, jak možna siabie abaranić ad napadu na vulicy. Spartoviec upeŭnieny — kursy pa samaabaronie tut ničym nie dapamohuć.
Vital Rak. Fota: «Naša Niva»
Vital raskazvaje, što paśla napadu na Lizu ŭ jaho kłub źviartajecca šmat žančyn z prośbaj arhanizavać zaniatki pa samaabaronie. Taksama, kaža jon, u sacsietkach ciapier šmat abjaŭ, dzie abiacajuć za 5-10 zaniatkaŭ navučyć samaabaronie.
Ale, na dumku treniera, nie ŭsie razumiejuć sutnaść samaabarony:
«5-15 zaniatkaŭ nie chopić, kab sfarmiravać naležnyja navyki. Taksama dla luboj aktyŭnaści, źviazanaj z supraćdziejańniem ludziam, treba baza ź fizičnych jakaściaŭ — kaardynacyja, moc, tryvałaść, i jana farmirujecca za hody trenirovak. Tady heta ŭžo nie kursy, a paŭnavartasny padrychtoŭčy praces, jaki patrabuje vydatkavać vysiłki, čas i hrošy.
Siońnia šmat kamu ź ludziej bolš padabajecca pasłuchać šarłatana, jaki abiacaje chutka navučyć samaabaronie, i schadzić na dziesiać viasiołych zaniatkaŭ, čym hadami pacieć u zale trojčy na tydzień».
Trenier zhadvaje videa z trenirovak pa samaabaronie, dzie ludziej vučyli adbivacca ad napadnika z nažom pakietam hrečki. Pry takoj situacyi, kaža jon, ałharytm pavodzinaŭ zusim inšy, a chtości projdzie taki kurs, budzie ličyć, što pakietam hrečki možna efiektyŭna abaranicca ad naža, i moža navat pasprabavać heta zrabić.
Byli vypadki, raskazvaje Vital, kali achviary vuličnych napadaŭ hublalisia i zabyvali vykarystać zbroju suprać złačyncy, navat prafiesijnyja spartoŭcy časam prajhrajuć u realnych pajadynkach. Kali situacyja stresavaja, dapamohuć tolki tyja viedy, jakija zamacavanyja na padśviadomym uzroŭni, sapraŭdnyja navyki.
Ź inšaha boku, kaža Vital, nie abaviazkova vałodać adzinaborstvam, kab dać rady złačyncu: «90% pośpiechu — heta psichałahičnaja stabilnaść pry napadzie, chutki apieratyŭny analiz situacyi i pryniaćcie pravilnych rašeńniaŭ, dla hetaha ŭsiaho adzinaborstvy nie abaviazkovyja.
Ale sistemnyja zaniatki lubym adzinaborstvam pry najaŭnaści dobraha treniera i mietodyk trenirovak robiać psichiku bolš hnutkaj i stabilnaj va ŭmovach kanfliktu.
Hrajuć rolu i asabistyja danyja čałavieka, na jakoha napali, bo kali čałaviek razhubiŭsia i tarmazić, jamu nie dapamohuć ni adzinaborstvy, ni zbroja. A razvahi, jakoje adzinaborstva lepšaje — heta poŭnaje hłupstva».
Navat padrychtoŭka ŭ adzinaborstvach nie zaŭsiody dapamoža suprać hrubaj fizičnaj siły, tym bolš što napadajuć tady, kali złačyniec upeŭnieny ŭ pieravazie. Vynik vuličnaha pajadynku zaležyć i ad abstavinaŭ: naprykład, złačyniec moža mieć zbroju abo la čałavieka, jaki abaraniajecca, moža znajścisia padručny srodak samaabarony, butelka.
Što nasamreč dapamoža abaranicca? Trenier raić prosta nie chadzić pa vulicy ŭ ciomny čas sutak i ŭ ciomnych miescach, a kali hetaha nie paźbiehnuć, być uvažlivym i hatovym u luby momant źbiehčy ad niebiaśpieki:
«Toj navyk, jaki ŭ nas u kožnaha jość ad pryrody — heta zdolnaść źbiehčy. Kali napadajuć na žančynu, jana nie moža fizična supraćstajać mužčynie, ale dla jaje realna źbiehčy ad jaho — zrabić ryvok i vybiehčy na aśvietlenaje miesca, paklikać na dapamohu».
Akramia hetaha, možna dać rady napadniku, kali maješ peŭnyja srodki abarony — Vital kaža, što ŭsim dastupnyja elektrašokier i hazavy bałončyk, ź ich dapamohaj možna dezaryjentavać złačynca na peŭny čas, za jaki vy paśpiejecie paklikać na dapamohu.
Kab psichična padrychtavacca da napadu, kaža trenier, važna razumieć: luby sučasny jeŭrapiejski horad — heta niebiaśpiečnaje miesca, u lubym socyumie jość nieadekvaty, jakija mohuć atakavać. Z hetym razumieńniem treba žyć, a lepš rychtavacca da napadu. Ale heta nie dziesiać urokaŭ samaabarony, a składany sistemny praces.
Vital nazyvaje infantylnaj dumku pra toje, što možna zabyć pra biaśpieku, bo vuličny hvałt u pryncypie niedapuščalny: «Možna i lvu ŭ džunhlach kryknuć pierad śmierciu, što jon nie maje prava vas jeści, ale heta nie dapamoža».
«Naša Niva» — bastyjon biełaruščyny
PADTRYMAĆČytajcie taksama:
Śviedki raspaviali, čamu nie vyklikali palicyju padčas zhvałtavańnia biełaruski ŭ Varšavie
