Siońnia ŭ Minsku projdzie dabračynnaja ekskursija, pryśviečanaja Źmitraku Biadulu
Ekskursija źjaŭlajecca dabračynnaj — zaroblenyja hrošy buduć pieraličany na śpiecyjalny rachunak dla stvareńnia nadmahilnaha manumienta kłasiku.
«Biełaruskaja chatka» raźmieščana niepadalok ad stancyi «Instytut kultury». Fota: holiday.by
Muziej historyi biełaruskaj litaratury zaprašaje siońnia na ekskursiju, pryśviečanuju adnamu sa znakamitych haspadaroŭ muzieja «Biełaruskaja chatka» (Rabkoraŭskaja, 17, rajon Instytuta kultury) — kłasiku biełaruskaj litaratury Źmitraku Biadulu.
Razam ź siostrami Reniaj i Hieniaj jon pražyŭ u hetym domie z 1915 pa 1918 hady. Tut u kastryčniku 1916 hoda Biadula daŭ prytułak užo chvoramu Maksimu Bahdanoviču, sastupiŭšy jamu samy vialiki pakoj.
Muziej prapanuje padarožža pa ekspazicyi doma-muzieja, nazvanaha ŭ honar kłuba minskaj intelihiencyi «Biełaruskaja chatka», siabrami jakoha byli Maksim Bahdanovič, Źmitrok Biadula i inšyja dziejačy biełaruskaj kultury.
«Šmat što pieražyŭ i pamiataje hety budynak. Mnostva daŭnich padziej, ščymlivych uspaminaŭ, chvalujučych historyj hatova paŭstać tut skroź zasłonu času i zahučać dla tych, chto choča słuchać…
Na ekskursii vy bolš daviedajeciesia pra Źmitraka Biadulu jak talenavitaha piśmieńnika, čyje tvory byli ŭzhadavanyja na biełaruskaj hlebie, napitanyja falkłorna-mifałahičnymi krynicami, napoŭnienyja luboŭju da rodnaj ziamli i biełaruskaha naroda. Vy adkryjecie dla siabie Źmitraka Biadulu jak aktyŭnaha ŭdzielnika litaraturna-hramadskaha ruchu pačatku XX st. u Minsku», — havorycca na staroncy muzieja.
Ekskursija źjaŭlajecca dabračynnaj — zaroblenyja hrošy buduć pieraličany na śpiecyjalny rachunak, dzie akumulujucca srodki na stvareńnie nadmahilnaha manumienta kłasiku.
- Košt: 20 rub. (heta budzie vaš uniosak u važnuju i hanarovuju spravu).
- Kali: a 15-j hadzinie
- Dzie: h. Minsk, vuł. Rabkoraŭskaja, 19 (filijał «Biełaruskaja chatka»).
- Zapis pa teł. +375 (17) 363 94 65 abo praz paviedamleńni ŭ sacyjalnych sietkach.
- Anałahičnaja ekskursija projdzie taksama praź miesiac, 6 krasavika.
Čytajcie taksama:
Stała viadoma, jak budzie vyhladać nadmahille Źmitraka Biaduli
Źmitraka Biadulu pierapachavali ŭ Minsku pad pravasłaŭnym kryžam i ruskamoŭnaj šyldačkaj FOTA
