Adkaz Google na GPT-4: ŠI-madel Gemini pazicyjanujecca jak «samaja zdolnaja madel, jakuju my kali-niebudź stvarali»
Kampanija płanuje ŭklučyć novuju madel štučnaha intelektu va ŭsie svaje pradukty, pačynajučy z čat-bota Bard.
Vyjava: Google
Hiehiemonija kampanii OpenAI u śfiery hienieratyŭnaaha štučnaha intelektu, mahčyma, padychodzić da zaviaršeńnia. U pačatku śniežnia Google aficyjna pradstaviŭ svaju samuju zdolnuju na siońnia moŭnuju madel pad nazvaj Gemini 1.0, jakaja pazicyjanujecca jak pieršaja z «novaha pakaleńnia madelaŭ ŠI, natchnionych tym, jak ludzi razumiejuć śviet i ŭzajemadziejničajuć ź im».
Padčas prezientacyi było skazana šmat hučnych słoŭ pra ŭsie pieradavyja «navaroty», jakija, pa słovach pradstaŭnikoŭ kampanii, robiać Gemini «samaj sučasnaj ŠI-madellu amal va ŭsich śfierach». Sistema była raspracavanaja jak «intehravany multymadalny štučny intelekt».
Mnohija siońniašnija ŠI-madeli mohuć składacca z hrup mienšych madelaŭ, pryčym kožnaja asobnaja madel navučanaja vykonvać svaju śpiecyfičnuju funkcyju jak častka bolšaha cełaha. Usio heta dobra dla «niehłybokich» funkcyj (naprykład, dla apisańnia malunkaŭ), ale nie vielmi dobra pasuje dla składanych zadač myśleńnia.
Gemini ž była z samaha pačatku navučanaja i naładžanaja na «roznych madalnaściach», što dazvoliła madeli «płaŭna razumieć i razvažać pra ŭsie vidy ŭvachodnych danych z nula, značna lepš, čym najaŭnyja multymadalnyja madeli», pieradaje słovy pradstaŭnikoŭ Google vydańnie Engaget. Mahčymaść prymać roznyja formy danych adnačasova pavinna dapamahčy Gemini davać lepšyja adkazy na bolš składanyja temy kštałtu, naprykład, fiziki.
Zajaŭlajecca taksama, što Gemini ŭmieje kadziravać: madel vałodaje papularnymi movami prahramavańnia, uklučajučy Python, Java, C++ i Go. Google navat vykarystaŭ śpiecyjalizavanuju viersiju Gemini dla stvareńnia AlphaCode 2, pierajemnika letašniaha hienieratyŭnaha ŠI, jaki pieramoh u śpiecyjalizavanym konkursie. Jak śćviardžajuć u kampanii, AlphaCode 2 vyrašyŭ udvaja bolš prablemnych pytańniaŭ, čym jaho papiarednik, što pavysiła jahonuju pradukcyjnaść bolš čym na 85 adsotkaŭ u paraŭnańni ź inšymi udzielnikami konkursu.
Chacia Google nie adrazu padzialiŭsia kolkaściu paramietraŭ, jakija Gemini moža vykarystoŭvać, kampanija rekłamavała apieracyjnuju hnutkaść madeli i zdolnaść pracavać u roznych form-faktarach: ad vialikich centraŭ apracoŭki danych da łakalnych mabilnych pryład. Z hetaj metaj Gemini vypuskajecca ŭ troch pamierach: Nano, Pro i Ultra.
Nano źjaŭlajecca samaj maleńkaj z tryo i pryznačanaja ŭ asnoŭnym dla zadač na pryładach. Viersija Pro — bolš univiersalnaja i zdolnaja prapanova — nieŭzabavie budzie intehravanaja ŭ mnohija z najaŭnych praduktaŭ Google, u tym liku ŭ čat-bot Bard. Nieŭzabavie Bard pačnie vykarystoŭvać śpiecyjalna naładžanuju viersiju Gemini Pro, jakaja, jak abiacaje kampanija, budzie prapanoŭvać «bolš prasunutyja razvahi, płanavańnie, razumieńnie i mnohaje inšaje».
U nastupnym hodzie, z vychadam Gemini Ultra, Google taksama prezientuje Bard Advanced — jašče macniejšy ŠI z dadatkovymi funkcyjami. Ultra nie budzie dastupny prynamsi da 2024 hoda, pakolki patrabujecca dadatkovaje testavańnie. Ale kali jon źjavicca, Ultra abiacaje stać nievierahodna mahutnym dla dalejšaha raźvićcia ŠI, abiacaje kampanija.
Čytajcie taksama:
Google daje svajmu ŠI mahčymaść stvarać i adładžvać kod
Štučny intelekt: jak Google płanuje pierachapić lidarstva ŭ hetaj halinie
