U kiroŭcy, jaki ŭčora nibyta kinuŭ vybuchovuju pryładu ŭ vajskoŭcaŭ, u kabinie była «ekstremisckaja simvolika» — łahatyp «Ramštajna»
Śledčy kamitet daŭ krychu padrabiaznaściaŭ pra ŭčarašni nibyta napad kiroŭcy fury na vajskoŭcaŭ, jakija byli «na ŭzmacnieńni dziaržaŭnaj hranicy». Apublikavanaje videa, jakoje, praŭda, ničoha nie tłumačyć.
Skrynšot videa
Jak śćviardžajuć łukašenkaŭskija śledčyja, uviečary 11 maja na aŭtadarozie M-5 Minsk — Homiel pablizu vioski Jasień Asipovickaha rajona (heta daloka ad luboj miažy) 50-hadovy kiroŭca aŭtamabila DAF, jaki prajazdžaŭ la vajskovaj transpartnaj kałony, zrabiŭ padryŭ «nieŭstanoŭlenaj pryłady». Pryłada taja nibyta była samastojna vyrablenaja ź piratechničnych vyrabaŭ, mužčyna kinuŭ jaje ŭ bok vajskoŭcaŭ i vajskovaj techniki, a paśla pasprabavaŭ uciačy.
Pry hetym na pakazanym videa ŭ kabinie aŭto — zvyčajnyja pietardy. Imavierna, niejkuju ź ich moh kinuć mužčyna.
Padčas pieraśledu, jak śćviardžajecca, jahony aŭtamabil byŭ błakavany vajskoŭcami, a sam mužčyna zatrymany.
Padobna da taho, što čałavieku buduć šyć «palityku», bo śćviardžajecca, što «kabina aŭtamabila mužčyny ableplenaja ekstremisckaj simvolikaj», a ŭ mabilnym telefonie — «mnostva padpisak na radykalnyja kanały, pryznanyja ekstremisckimi».
Siarod prademanstravanaj u videa «ekstremisckaj simvoliki» byŭ zaŭvažany i łahatyp papularnaha niamieckaha hurta «Ramštajn».
Suprać mužčyny, jak paviedamlajecca, zaviali kryminalnuju spravu pa artykule za asabliva złosnaje chulihanstva (č. 3 art. 339).
