«Mama kryčała, što zabje mianie». Darja Trepava dała pieršaje intervju paśla vybuchu ŭ pryhožynskim kafe
2 krasavika ŭ Pieciarburhu prahrymieŭ vybuch u kaviarni Jaŭhiena Pryhožyna, dzie čytaŭ lekcyju vajenkar Uładlen Tatarski. Jon zahinuŭ, jašče 40 čałaviek paciarpieli. Statuetku z vybuchoŭkaj u kafe pryniesła 26-hadovaja Darja Trepava. Jaje zatrymali na nastupny dzień. Pavodle viersii FSB, terakt arhanizavali ŭkrainskija śpiecsłužby z padtrymkaj zabaronienaha FBK Navalnaha. Trepavu ŭnieśli ŭ śpis terarystaŭ, joj pahražaje pažyćciovaje. Dziaŭčyna dała «Ratondzie» pieršaje intervju.
Pra vybuch
Ja vielmi škaduju ab tym, što adbyłosia, malusia pra zdaroŭje paciarpiełych i pasprabuju arhanizavać zbor srodkaŭ na adnaŭleńnie achviaram trahiedyi. Kab majo škadavańnie nie vyhladała cynična, dadam, što zastałasia ŭ žyvych, miarkujučy pa ŭsim, čysta vypadkova. (Trepava padaryła Tatarskamu statuetku i sieła davoli blizka da jaje.)
Pra svajakoŭ
Paśla zdareńnia, jak tolki zrazumieła, što zdaryłasia, — adrazu napisała mamie, vybačyłasia, bo razumieła, što mianie buduć šukać i pryjduć da jaje. Potym ja bačyła kadry šturmu kvatery. Ja była ŭ šoku, i mnie było žudasna soramna. U Śledčym kamitecie apieratyŭniki kazali, što jana kryčała, što zabje mianie, kali jaje viali na dopyt. Ad hetaha mnie taksama chaciełasia pamierci. Jašče SACHR jeździŭ da majho dziaduli, jamu za 80. Apieratyŭniki skazali, što mama pajechała ź imi, kab jon nie byŭ adzin. U SK mnie dali patelefanavać mamie, ale jana nie ŭziała telefon.
Pra niečakanuju źmienu pracy
Ja zaŭsiody cikaviłasia vintažnym adzieńniem. U škole nasiła adzieńnie z babulinych kufraŭ i niešta, nabytaje na barachołkach. Mnie padabałasia maja praca (u kramie vintažnaha adzieńnia), i ja sama ŭkładvałasia ŭ kramu jak u prajekt. U studzieni ŭ nas z uładalnikam paŭstali roznahałośsi, i my razyšlisia. Mnie było kryŭdna. Ale tady ja paličyła, što heta punkt rostu, da taho ž napiaredadni zvalnieńnia siabar-žurnalist prapanavaŭ pierajechać va Ukrainu i pasprabavać siabie ŭ roli vajenkara.
Pra źniavoleńnie
U kamiery pieršyja 10 dzion ja była adna — heta nievynosna. Spačatku ŭ mianie nie było ni knižki, ni cyharet. Dniom nielha spać pad koŭdraj. U kamiery chałodna. Ja chavałasia pad kurtkaj i hladzieła ŭ ścianu. Ciapier da mianie padsialili dziaŭčynu, jana tut try hady. I ja šmat hladžu kanał «Karusiel». Na inšych jość ryzyka ŭbačyć kadry, sami razumiejecie, adkul. Sumna, što ja bolš nie zmahu lažać doma i hladzieć mulciki ź siastroj. U Lafortava amal nie puskajuć abaroncaŭ. Z SK prychodzili 3—4 razy, a z advakatam ja nie bačyłasia dahetul.
Što zabiła čałavieka
Bolš za ŭsio chočacca pamierci. Raz za razam prakručvaju ŭsie padziei ŭ hałavie. [Repier] Kańje Uest niejak skazaŭ: «Nie mir ja prynios vam, ale mieč» (u aryhinale fraza naležyć Isusu Chrystu — «Ratonda»). I ja ŭsio dumaju, jak tak vyjšła, što ja nie zaŭvažyła miača ŭ svaich rukach. Čamu lohka pavieryła, što ŭ pasyłcy, jakuju mianie paprasili pieradać, niama ničoha niebiaśpiečnaha.
Samaje nievynosnaje — maimi rukami zabili čałavieka i pakalečyli dziasiatki. Ja zaŭsiody była suprać hvałtu, tamu i prytrymlivałasia [pacyfisckaj] pazicyi. Nu i sami razumiejecie, jak hetym skarystalisia…
Pra samahubstva
Kab trymacca, ja napisała list sabie pra toje, što ja b nikoli nie prykłała ruku da hvałtu, što ja nie viedała, čym heta skončycca, što jość ludzi, jakija mianie viedajuć i spačuvajuć, što, kali ja pamru, zrablu blizkim baluča, dy i prablem ad hetaha ŭ ich mienš nie stanie.
Pra hvałt
Dumała, što publičnaść nakładvaje abaviazacielstvy — jak byccam by ad mianie patrabujecca zajava. Adzinaje, što ja chacieła b skazać, nie pamianšajučy majoj viny: hvałt sparadžaje hvałt.
Pra listy ŭ SIZA
Vaš list — druhi za čas znachodžańnia tut. Ja čakała listoŭ ad siabrovak, ale nie ŭpeŭnienaja, što ich da mianie prapuściać. A pieršy list byŭ ad kiraŭnika Ruskaha dobraachvotnickaha korpusa (miarkujučy pa ŭsim, Darja pierabłytała, i pisali joj rasijskija dobraachvotniki, RDK vajuje na baku Ukrainy — «Ratonda»), u jakim jon pytajecca, jak ja z vydatnicy ŭ škole «dajšła da žyćcia takoha, staŭšy terarystkaj u chachłoŭ». Hetamu listu ja była rada. Da taho ž aŭtar bieskaryśliva pračytaŭ mnie kurs historyi Ukrainy, za što jamu vialiki dziakuj.
Čytać taksama:
Na pachavańnie prapahandysta Tatarskaha «vahnieraŭcy» prynieśli kuvałdu
