«Słava Ukrainie!» SBU kančatkova ŭstanaviła asobu rasstralanaha ŭ pałonie bajca. Zialenski prysvoiŭ jamu zvańnie Hieroja Ukrainy
Słužba biaśpieki Ukrainy paviedamiła, što ŭkrainskim vajskoŭcam, jakoha rasstralali paśla słoŭ «Słava Ukrainie!», byŭ snajpier 163 bataljona 119 asobnaj bryhady TRA Čarnihaŭskaj vobłaści Alaksandr Macijeŭski.
Rasstralany bajec Čarnihaŭskaj TRA Alaksandr Macijeŭski. Fota: SBU.
«Kančatkova paćvierdzić źviestki hieroja ŭdałosia paśla kompleksu śledčych dziejańniaŭ, jakija ŭklučali razmovy z rodnymi i pabracimami zahinułaha, a taksama apracoŭku fota- i videamateryjałaŭ. Akramia taho, SBU atrymała zaklučeńnie sudovaj partretnaj ekśpiertyzy, jakoj paćvierdžana, što vajskoviec na videa — mienavita Alaksandr Macijeŭski», — havorycca ŭ paviedamleńni viedamstva.
Alaksandr Macijeŭski byŭ pryzvany na vajskovuju słužbu ŭ sakaviku 2022 hoda. Z kanca śniežnia jon ličyŭsia źnikłym bieź viestak pablizu nasielenaha punkta Čyrvonaja Hara ŭ Danieckaj vobłaści.
Jak udałosia ŭstanavić SBU, Macijeŭskaha rasstralali 30 śniežnia 2022 hoda. Jaho cieła viarnuli dadomu ŭ lutym 2023-ha.
DAPOŬNIENA. Uładzimir Zialenski prysvoiŭ Alaksandru Macijeŭskamu zvańnie Hieroja Ukrainy
«Za jaho chrabraść, za jaho ŭpeŭnienaść — va Ukrainie — i za jaho «Słava Ukrainie!», — skazaŭ prezident u videazvarocie.
