Mužčynu, jaki paraniŭ milicyjaniera nažom, moža pahražać śmiarotnaje pakarańnie
MUS raskazała pra abstaviny niadaŭniaha napadu na milicyjaniera ŭ Minsku, kali toj u adkaz prymianiŭ tabielnuju zbroju. Supracoŭnik milicyi ciapier znachodzicca ŭ špitali, a na napadnika zaviedzienaja kryminalnaja sprava.
Incydent adbyŭsia 6 sakavika. Pa viersii milicyi, na liniju «102» pastupiŭ zvanok ad minčanki, jakaja paviedamiła, što były muž pahražaje joj z-za padziełu majomaści.
Narad milicyi, jak śćviardžaje pres-słužba MUS, vybyŭ na miesca. Padčas raźbiralnictva mužčyna vychapiŭ kuchonny nož, jaki byŭ pry im, i nanios im niekalki ŭdaraŭ supracoŭniku milicyi. Toj u adkaz streliŭ na paražeńnie z tabielnaj zbroi. Jak śćviardžaje MUS, heta było «pravamiernaje i rašučaje» dziejańnie z boku milicyjaniera, nakiravanaje na abaronu nie tolki siabie, ale i zajaŭnicy dy naparnika. U jakim stanie znachodziŭsia mužčyna padčas incydentu, nie paviedamlajecca.
Paciarpiełamu milicyjanieru ŭsiaho 18 hadoŭ. Jon, jak kažuć, tolki niadaŭna prajšoŭ pieršapačatkovuju padrychtoŭku, a ciapier znachodzicca ŭ špitali.
Suprać napadnika zaviedzienaja kryminalnaja sprava za zamach na zabojstva supracoŭnika orhanaŭ unutranych spraŭ. Jamu pahražaje da dvaccaci piaci hadoŭ pazbaŭleńnia voli, pažyćciovaje źniavoleńnie, a moža być prysudžanaje navat śmiarotnaje pakarańnie.
Pry hetym nielha vyklučać, što hetuju nibyta bytavuju spravu mohuć vykarystać i ŭ palityčnych metach, pakolki ŭ paviedamleńni pres-słužby MUS akcentujecca ŭvaha na tym, što raniej abvinavačany pryciahvaŭsia da kryminalnaj adkaznaści za abrazy pradstaŭnikoŭ ułady, a ŭ 2020 hodzie aktyŭna ŭdzielničaŭ u pratestach.
Čytajcie taksama:
