Kamandzir roty skazaŭ žoncy, što jaho viazuć na rasstreł za deziercirstva padnačalenych. Paźniej jaho pryvieźli ŭ cynkavaj trunie
Asudžany Viktar Sievalnioŭ, jaki kamandavaŭ 7-j motastrałkovaj rotaj tak zvanaj narodnaj milicyi «ŁNR», 20 listapada patelefanavaŭ žoncy Lilii i raspavioŭ, što jaho źbirajucca pavieźci ź lakarni, dzie jon adnaŭlaŭsia paśla ranieńnia na froncie, i rasstralać za toje, što sałdaty jaho roty dezierciravali. Zapis hetaj razmovy Sievalniova z žonkaj pieradaŭ The Insider kiraŭnik Gulagu.net Uładzimir Asiečkin.
«Siońnia ja, zaŭtra inšy, voś i ŭsio. My dla ich zabojny materyjał.
Minabarony rasstrelvaje ludziej. Jany viedajuć, što my dvuchsotyja, i im pochieru. Ja chacieŭ by nazad, dzie ja byŭ, a jany mnie nie dajuć. Kab ja viedaŭ, što heta takaja vajna.
Ja Sievalnioŭ Viktar Anatoljevič, 27 vieraśnia 1979 hoda naradžeńnia. Nie dasyłajcie siudy ludziej, chopić. Jany chočuć usich zabić», — heta apošniaje paviedamleńnie, jakoje Sievalnioŭ pieradaŭ praz žonku.
Užo 1 śniežnia pradstaŭnik Minabarony RF paviedamiŭ Lilii, što jaje muž zahinuŭ u «DNR» 25 listapada ad askołačnych ranieńniaŭ i mahutnaha ŭdaru pa hałavie. Jon paabiacaŭ, što chutka joj u Maskvu dašluć cynkavuju trunu ź ciełam i dakumientami. I dadaŭ: «Spačuvaju, prabačcie».
Pradstaŭniki PVK Vahniera niekalki razoŭ pryjazdžali ŭ VK-3 u Kałužskaj vobłaści, dzie adbyvaŭ pakarańnie Sievalnioŭ.
Spačatku jany zavierbavali na vajnu jaho syna Aleha, jaki siadzieŭ u toj ža kałonii. Kali syn zahinuŭ padčas bajavych dziejańniaŭ, Sievalnioŭ vyrašyŭ sam adpravicca vajavać. Jon padpisaŭ kantrakt ź Minabarony i ŭ noč z 3 na 4 kastryčnika jaho etapavali z kałonii ŭ «łahier zładžvańnia» Łuhanskaj vobłaści.
Sievalniova dałučyli da vajskovaj čaści 08807 («ŁNR»). Jon vajavaŭ u 7-j motastrałkovaj rocie, i, kali kamandzira roty zabili, jaho pryznačyli kamandziram, bo mieŭ bajavy dośvied u Čačni.
Sievalniova navat uznaharodzili ordenam za toje, što rota pad jaho kamandavańniem vyjšła z akružeńnia.
U listapadzie jaho rota paniesła vialikija straty, častka bajcoŭ zahinuła, astatnija raźbiehlisia.
Ad paviedamleńniaŭ ab zabojstvie Sievalnieva Pryhožyn adchryściŭsia. «U šerahach PVK «Vahnier» nikoli nie było hetaha čałavieka, jon nikoli nie prybyvaŭ ni ŭ jakija łahiery padrychtoŭki i nikoli nie pracavaŭ u PVK «Vahnier», — takoje paviedamleńnie apublikavana ŭ jaho Telegram-kanale ŭ adkaz na prośbu prakamientavać historyju Sievalniova, raskazanuju prajektam Gulagu.net.
Kali vieryć słovam pradstaŭnika Minabarony, jaki ahladaŭ zahinułaha Sievalniova, traŭmy na jaho ciele mohuć być vynikam udaru kuvałdaj. «Askiepkavaje ranieńnie pa ciele, i ŭ hałavu stuknuła mocna, pałamała čerap», — raspavioŭ jon.
Na dumku Asiečkina, da zabojstva Sievalniova mohuć mieć dačynieńnie «anałahi PVK Vahniera» z «ŁDNR», a adkaznaść za jaho zabojstva, taksama jak i za zabojstva Nužyna, niasie Minabarony RF.
Kiraŭnik Gulagu.Net adznačaje, što vajskovaja čaść №08807, da jakoj byŭ prykamandziravany Sievalnioŭ, nie maje dačynieńnia da PVK Vahniera. «U jaho motastrałkovaj rocie byli jak źniavolenyja, tak i mabilizavanyja z DNR i ŁNR», — rastłumačyŭ jon The Insider.
Pravaabaronca Volha Ramanava paviedamiła raniej u intervju vydańniu «Možiem objaśniť», što asabista joj viadoma pra 40 vypadkaŭ «pakarańniaŭ śmierciu» asudžanych, zavierbavanych na vajnu. Ramanava spasłałasia na svajakoŭ źniavolenych, jakija źviarnulisia ŭ pravaabarončuju arhanizacyju «Ruś Sidiaŝaja». «Na našaj pamiaci bolš-mienš niejak paćvierdziłasia 40 čałaviek [pakaranych]. U ich heta nazyvajecca «abnulić»», — raspaviała pravaabaronca. — I ničoha jamu za heta nie budzie».
Čytajcie taksama:
Rasijski kanał źniaŭ na videa žachlivaje pakarańnie vahnieraŭca, jaki zdaŭsia ŭ pałon
«Vahnieraŭcy» karajuć śmierciu byłych źniavolenych dziasiatkami, a adkaznaści nie bajacca
