Spravu Darji Łosik pieradali ŭ prakuraturu
Pra pieradaču spravy Darji Łosik u prakuraturu paviedamili praŭładnyja kanały, z ułaścivym im cynizmam adznačyŭšy, što heta «padarunak da dnia naradžeńnia». U čym dakładna jaje abvinavačvajuć, pakul nieviadoma.
Pavodle siłavikoŭ, Darju zatrymali za «sadziejničańnie ekstremisckaj dziejnaści» (art. 361-4 KK) — nibyta za razmovu z telekanałam «Biełsat» viasnoj 2022 hoda.
Darju Łosik, žonku palitviaźnia Ihara Łosika, zatrymali 18 kastryčnika. Małaja dačka Ihara i Darji ciapier znachodzicca ŭ babuli ź dziadulem.
Učora Darja adznačyła za kratami 31-hodździe.
Pravaabarončy centr «Viasna» adznačaje, što administracyja bresckaha SIZA zaličvaje vahu pasyłak dla Darji ŭ ahulnuju vahu pieradač. Tamu prośba — nie dasyłajcie joj pasyłki biez uzhadnieńnia sa svajakami. Ale ŭ toj ža čas Darju možna padtrymać hrašovymi pieravodami, paštoŭkami, listami i telehramami.
