Aniestezijołah, jakaja lačyła Cimura Mickieviča paśla źbićcia na pratestach, — za kratami. Što viadoma pra hetuju spravu?
Aniestezijołaha-reanimatołaha Dziciačaj haradskoj kliničnaj balnicy №2 Minska Taćcianu Tałočku zatrymali 12 maja. Jaje abvinavačvajuć u parušeńni hramadskaha paradku (art. 342 KK) i ŭ padrobcy dakumientaŭ. Pa słovach rodnych, siłaviki ličać, što ŭ 2020 hodzie Taćciana dapamahła vyratavacca ad kryminalnaha pieraśledu padletku Cimuru Mickieviču, piša Deutsche Welle.
Taćciana Tałočka. Fota Spring96.org
12 žniŭnia 2020 hoda niepaŭnaletni Mickievič apynuŭsia ŭ reanimacyi paśla źbićcia i katavańniaŭ siłavikoŭ, daktaram pryjšłosia ŭvieści padletka ŭ miedykamientoznuju komu. 3 vieraśnia Mickieviča vyklikali na dopyt va ŭpraŭleńnie Śledčaha kamiteta pa Minsku. Na dumku śledčych, jon udzielničaŭ u masavych biesparadkach 10 žniŭnia na vulicy Prytyckaha i byŭ datyčny da ŭzbrojenaha napadu na kiroŭcu hruzavoha aŭtamabila MAZ. Padčas adnaho z dopytaŭ Mickieviču stała drenna, jon znoŭ trapiŭ u reanimacyju. Praź niekalki dzion Cimur źnik z balnicy. Padletku ŭdałosia źbiehčy z krainy. Ciapier 19-hadovy Mickievič vajuje na baku Ukrainy ŭ biełaruskim pałku Kastusia Kalinoŭskaha.
Taćciana Tałočka była doktaram Cimura Mickieviča. «HUBAZiK nie zmoh jaho dapytać u balnicy, praz troje sutak siłaviki nie znajšli, u čym jaho abvinavacić, źniali kanvoj i chłopiec źbieh, kali vieryć kaleham Taćciany, užo nie ź jaje adździaleńnia, — raspaviadajuć rodnyja doktarki.
— My nie viedajem dakładna, ale bačym heta tak: Tania ŭvachodziła ŭ skład kamisii, jakaja pryniała rašeńnie ab tym, što Mickieviča nielha dapytvać, h. zn. jaje podpis, tearetyčna, pavinien być pad hetym rašeńniem, jak i podpisy inšych daktaroŭ. Mabyć, siłaviki ličać, što Tania mahła dać Mickieviču niejkija preparaty ci inšymi dziejańniami zrabiła tak, što jaho stan pahoršyŭsia, i miedycynskaja kamisija pryniała rašeńnie, što dopyt pravodzić nielha».
Nakolki viadoma rodnym, z usich supracoŭnikaŭ balnicy zatrymali tolki Tałočku.
Pa słovach surazmoŭcaŭ, paśla zatrymańnia Taćciana 25 dzion praviała na Akreścina — spačatku ŭ Centry izalacyi pravaparušalnikaŭ, paśla ŭ izalatary časovaha ŭtrymańnia — bieź pieradač, listoŭ, u pierapoŭnienych kamierach ź biazdomnymi.
Taksama HUBAZiK zatrymlivaŭ muža Taćciany. Surazmoŭcy DW kažuć, u adździaleńni mužčynu źbivali, kab heta čuła Taćciana i padpisała patrebnyja siłavikam pryznańni.
Ciapier doktarka znachodzicca ŭ SIZA №1 pa vulicy Vaładarskaha. Tut, adznačajuć blizkija, umovy ŭtrymańnia značna lepšyja, čym na Akreścina: u kamiery čatyry čałavieki, jość maleńki televizar i vientylatar, aryštantaŭ vodziać na prahułki, Taćcianie pieradajuć listy, jana moža sustrakacca z advakatam. Kali miedyka pačnuć sudzić, rodnym nieviadoma.
Čytajcie taksama:
Pamiatajecie 17-hadovaha Cimura Mickieviča, jaki ŭ žniŭni 2020-ha paśla źbićcia siłavikami byŭ u komie? Ciapier jon vajuje va Ukrainie
Pamierła maci 17-hadovaha Cimura, jaki apynuŭsia ŭ reanimacyi paśla pratestaŭ. Sirotami zastalisia dzieviać dziaciej
