За хабар асудзілі выкладчыка Баранавіцкага ўніверсітэта
Выкладчыка Баранавіцкага дзяржаўнага ўніверсітэта асудзілі на 1 год калоніі і 16 тысяч штрафу за хабар у 500 рублёў, паведаміў суд Баранавіцкага раёна і горада Баранавічы.
«Абвінавачаны Ч., з'яўляючыся службовай асобай, абавязанай ажыццяўляць навучальную, навуковую, выхаваўчую, ідэалагічную і вучэбна-метадычную працу ў УА «Баранавіцкі дзяржаўны ўніверсітэт» у 2023 годзе, згодна з раней дасягнутай дамоўленасцю, атрымаў у якасці хабару грашовыя сродкі ў памеры 500 рублёў за спрыяльнае вырашэнне пытання аб здачы студэнтамі групы экзамену па адной з дысцыплін», — гаворыцца ў паведамленні суда.
Пры гэтым не ўдакладняецца, які прадмет вёў гэты выкладчык і калі ды пры якіх абставінах ён быў затрыманы.
За атрыманне хабару мужчына быў асуджаны да аднаго года пазбаўлення волі ў калоніі агульнага рэжыму і штрафу ў памеры 400 базавых велічынь (16 тысяч рублёў), з пазбаўленнем права займаць пасады, звязаныя са здзяйсненнем юрыдычна значных дзеянняў, на тэрмін 5 гадоў.
Чытайце таксама:
У Мінску назвалі памер самага вялікага хабару за 2024 год
Лідчанін уладкаваўся на працу начальнікам па падробленым дыпломе. І пачаў браць хабар
