Удзельніку пратэстаў у Баранавічах далі 25 гадоў асобага рэжыму. Але ёсць нюанс
Падчас апошняга канвеернага суда над удзельнікамі пратэстаў у Баранавічах, аднаму з падсудных далі нечаканы прысуд — 25 гадоў калоніі асобага рэжыму. Вось што адбылося.
Аляксандр Лявончык. Фота з ягонай старонкі ў Аднакласніках
Асуджанага зваць Аляксандр Лявончык. Мы знайшлі толькі аднаго жыхара Баранавічаў з такімі звесткамі. Яму 41 год. Вядома, што мужчына доўгі час працаваў майстрам па дахах у Расіі. Таксама ў Лявончыка ёсць непаўналетняе дзіця.
У Лявончыка ўжо было 11 судзімасцяў, у тым ліку за забойства. Невядома, дзе ён яго здзейсніў — у спісе пастанаўленняў судоў мы не знайшлі ягонай справы.
Згодна з інфармацыяй з сайта Вярхоўнага суда, Лявончык з 10 па 11 жніўня 2020 удзельнічаў у пратэстах у Баранавічах, гучна выкрыкваў лозунгі, дэманстраваў беларускую нацыянальную сімволіку, чым «груба парушыў грамадскі парадак».
Яго не затрымлівалі за ўдзел у дэманстрацыях, але ў канцы 2021 асудзілі за новае забойства, здзейсненае з асаблівай жорсткасцю. Лявончык атрымаў за гэта 23 гады.
Цяпер сілавікі ідэнтыфікавалі яго як удзельніка пратэстаў. На новым працэсе Лявончыку прысудзілі яшчэ 3 гады зняволення. Але з улікам частковага паглынання тэрмінаў атрымалася 25 гадоў асобага рэжыму.
Адбываць пакаранне Лявончык будзе ў калоніі №13 у Глыбокім. Гэта адзіная калонія асобага рэжыму ў Беларусі. Там адбываюць пакаранне тры чалавекі, асуджаныя па чыста палітычных артыкулах — Мікалай Статкевіч, рэйкавы партызан Віталь Мельнік і Яраслаў Саковіч, якога асудзілі за перадачу звестак УСУ на 11 гадоў калоніі.
«Наша Нiва» — бастыён беларушчыны
ПАДТРЫМАЦЬЧытайце таксама:
Сталі вядомыя прысуды 8 з 17 чалавек, якіх учора судзілі ў Баранавічах за пратэсты 2020 года
67-гадовая беларуска вярнулася са Швецыі. Цяпер ёй пагражае да дзесяці гадоў турмы
