Віцэ-прэзідэнт «Лукойла» скончыў жыццё самагубствам
Пра смерць Віталя Робертуса было паведамлена ўчора.
Віцэ-прэзідэнт «Лукойла» Віталь Робертус скончыў жыццё самагубствам у сваім працоўным кабінеце на Срэценскім бульвары ў Маскве. Ён памёр ад асфіксіі, піша Brief.
Робертусу было 53 гады.
Робертус стаў ужо чацвёртым топ-менеджарам «Лукойла», які памёр цягам апошніх двух гадоў.
У кастрычніку 2023 года ў 66 гадоў з-за сардэчнай недастатковасці памёр кіраўнік рады дырэктараў кампаніі Уладзімір Някрасаў. Ён узначаліў раду дырэктараў пасля нечаканай смерці папярэдняга кіраўніка Рады Равіля Маганава. 1 верасня 2022 года Маганаў выпаў з верхняга паверха галоўнага корпуса Цэнтральнай клінічнай бальніцы (ЦКБ) і разбіўся.
Да таго ў траўні 2022 года ў падмаскоўных Мыцішчах памёр былы віцэ-прэзідэнт, начальнік Галоўнага ўпраўлення паставак і продажаў «Лукойла» Аляксандр Субоцін. Паводле даных выдання Mash, ягоная смерць настала ў ходзе няўдалага сеансу ў шаманаў, на якім Субоціна з дапамогай жабячай атруты спрабавалі вылечыць ад праблем з алкаголем.
Нечаканыя і загадкавыя смерці апошнім часам рэгулярна здараюцца і сярод топ-менеджменту іншых расійскіх буйных кампаній.
Чытайце таксама:
Самагубствы, забойствы і няшчасныя выпадкі. Як хваля смерцяў захліснула буйны расійскі бізнэс
У Расіі затрымалі былых топ-менеджараў піўной кампаніі «Балтыка», у справе ёсць беларускі след
