Хусіты «дапамаглі» Беларусі і Расіі з транзітам грузаў у Еўропу
Выданне Financial Times паведамляе, што з-за рэгулярных атак еменскіх хусітаў на гандлёвыя судны ў Чырвоным моры «рэзка ўзрос» попыт на чыгуначны транзіт грузаў у Еўропу праз Расію, Казахстан і Беларусь. Праз апошнюю за месяц стала праязджаць больш за 10 тысяч кітайскіх кантэйнераў.
Уладзімір Пуцін і Аляксандр Лукашэнка на фоне абстралянага еменскімі хусітамі гандлёвага судна ў Чырвоным моры. Фоты: AP / Contributor Getty Images. Калаж: «Наша Ніва»
Акрамя вышэй згаданых краін, таксама задзейнічаныя Азербайджан і Турцыя.
«Як адзначаюць еўрапейскія кампаніі DHL, RailGate Europe, Rail Bridge Cargo і Kuehne & Nagel, попыт на чыгуначны транзіт праз Расію і Беларусь за апошнія месяцы ўзрос на 25-40 працэнтаў.
Толькі за гэты студзень з Кітая ў Польшчу прайшло амаль 15 тысяч кантэйнераў аб'ёмам да 30 тон кожны. Такі шлях цяпер доўжыцца ад 25 да 30 дзён», — піша Financial Times.
Пры гэтым кампаніі падкрэслілі, што такая колькасць кантэйнераў у месяц усё роўна не можа параўнацца з грузапад'ёмнасцю сучасных кантэйнеравозаў, кожны з якіх можа перавозіць па 24 тысяч такіх кантэйнераў за раз.
Таксама аператары дадалі, што выконваюць санкцыйнае заканадаўства Еўрасаюза ў дачыненні да беларускай і расійскай прадукцыі. Некалькі з іх заявілі, што практычна не карыстаюцца маршрутам праз Расію і Беларусь пасля пачатку вайны ва Украіне.
«Аднак сам транзіт забараніць нельга, бо кантэйнеры з грузам ідуць не з Беларусі і Расіі, а з трэціх краін. Таму транзітныя краіны маюць магчымасць збіраць пошліны за транспарціроўку тавараў па сваёй тэрыторыі і за карыстанне сваімі чыгуначнымі шляхамі», — рэзюмуе Financial Times.
Чытайце таксама:
Ці могуць хусіты цалкам адсекчы сусветны інтэрнэт? Разбіраемся
Блізкі да Лукашэнкі бізнэсмен закупляе дэталі для расійскіх танкаў у Тайваня і Японіі. Хто ён?
Чым пагражае беларускай эканоміцы продаж угнаенняў па дэмпінгавых цэнах
