Дзяўчына страціла працу пасля таго, як папрасіла ў кіраўніка даведку аб даходах
Мінчанка адпрацавала ў сэрвісным цэнтры паўгода. Ёй для банка спатрэбілася даведка пра даходы за час працы ў кампаніі. Здаецца, звычайная просьба. Але на наступны дзень дзяўчыне патэлефанаваў уладальнік кампаніі і сказаў, што, па-першае, яна не была ў іх афіцыйна працаўладкавана (хоць і падпісала кантракт), а па-другое, яе звальняюць.
Скрыншот відэа ў тыктоку @manic_minsk
Такую непрыемную гісторыю распавяла мінчанка, якая вядзе тыкток пад нікам @manic_minsk. Дзяўчына сцвярджае, што яе падманула кіраўніцтва сэрвіснага цэнтру, дзе тая да нядаўняга часу працавала.
— Я адпрацавала ў гэтай кампаніі крыху больш за паўгода. У нейкі момант мне для банка спатрэбілася даведка аб даходах за 6 месяцаў. Я папрасіла яе ў кіраўніка. На наступны дзень мне тэлефануе ўласнік кампаніі і кажа, што я ў іх больш не працую і што афіцыйна я не была ў іх працаўладкавана. Хаця кантракт я падпісвала. Але высветлілася, што на кантракце няма подпісу кіраўніка. Але я, як чалавек, які юрыдычна не падкаваны, аб гэтым не ведала.
Дзяўчына кажа, што ўласнік кампаніі прапанаваў ёй грашовую кампенсацыю са сваёй кішэні.
— Мы не ведалі, ніхто не ведаў, соры, што так выйшла. Але ж ты напішы распіску, што ты не маеш да нас ніякіх прэтэнзій. Я адмовілася. Я папрасіла выплаціць усё, што яны мне павінны за апошні месяц, а таксама тое, што вылічалі мне нібыта падаходны. На наступны дзень, калі мы сустрэліся, мне не вярнулі мае дакументы і не выплацілі нічога. Сказалі: напішаш распіску, дадзім табе грошы. Не напішаш — не дадзім, ідзі адсюль. Ты ў нас афіцыйна прапрацавала адзін дзень.
Мінчанка кажа, што адмовілася, бо для яе важны ў першую чаргу не грошы, а яе гонар. Потым дзяўчына звярталася ў розныя службы, каб дабіцца справядлівасці.
— Усе службы нашы любімыя дзяржаўныя паслалі мяне на тры літары — у суд. Але ўвесь прыкол у тым, што ўсе службы, выслухаўшы маю гісторыю, проста накіроўвалі майму былому працадаўцу запыт, ці сапраўды я ў яго працавала. Канешне, кіраўніцтва адказвала, што не. Наступны мой пункт — суд. Пабачым, што мне скажуць там. Проста крыўдна, што ў нашай дзяржаве так ашукваюць людзей.
Відэа набрала 74 тысячы праглядаў і больш за 1860 лайкаў. У каментарыях людзі давалі парады, куды можна звярнуцца, а таксама расказвалі падобныя гісторыі: «Аналагічная сітуацыя ў знаёмых. Толькі там два гады. У судзе папрасілі білінг і вызначылі, што супрацоўнік быў на працы. Выйгралі істотную суму — 5 тысяч даляраў».
У наступным відэа дзяўчына распавяла, што падала заяву ў суд, хоць гэта было складана праз тое, што не было ўзору заявы — усё-такі сітуацыя не вельмі стандартная.
Дзяўчына таксама вырашыла адказаць на найбольш папулярнае пытанне з каментарыяў.
— Зарплату я атрымлівала раз у месяц на рукі. Мяне гэта не бянтэжыла толькі таму, што мяне вельмі добра пераконвалі ў тым, што гэта законна — а я наіўна верыла.
У яе таксама спыталі, куды ж звяртацца ў такіх выпадках.
— Спачатку я звярнулася ў ФСАН, але там мне змаглі толькі зрабіць выпіску з асабовага рахунку, каб пацвердзіць, што насамрэч я не была працаўладкавана. Далей я напісала электронны зварот у Міністэрства працы і сацабароны. Да гэтага я пакідала заяўку на гарачай лініі падатковай. Міністэрства і ФСАН адказалі, што звяртайцеся ў суд, мы нічым не можам вам дапамагчы. Таму вельмі чакаю рашэнне суда.
Чытайце таксама:
