Прадстаўнік літоўскага Сейма: Закрыем самыя апошнія клапаны рэжыму, але не беларускаму народу
Старшыня камітэта па замежных справах Сейма Літвы Жыгімантас Павіліёніс пракаментаваў «Нашай Ніве», як можа дзейнічаць Літва ў дачыненні да беларусаў у выпадку, калі Лукашэнка адправіць свае войскі ва Украіну.
Павіліёніс упэўнены, што дзеянні Лукашэнкі не зменяць пазіцыю Літвы ў дачыненні да беларускага народа.
«Мы заўсёды ведалі, што наш самы галоўны саюзнік у Беларусі — гэта беларускі народ. Я сам асабіста, будучы яшчэ дыпламатам, шмат працаваў па сітуацыі ў Беларусі, заўсёды адчуваў, што беларускі народ для мяне з усіх суседзяў на Усходзе найбліжэйшы.
Многім беларусам сказаў, што калі мы пераможам агульнага ворага, з якім зараз разам працуе Лукашэнка, то ваша інтэграцыя ў Еўропу, калі вы гэтага захочаце, будзе адбывацца вельмі хутка. Вы ніколі не былі па-за Еўропай. За апошнія сто гадоў Расійская Імперыя вашу ідэнтычнасць усімі сродкамі раздрабляла. Калі вы ў ёй [імперыі] застанецеся, то вас проста не стане. Гэта была праграма Лукашэнкі ў самым пачатку, хаця ён спрабаваў граць ролю суверэна. Мы ведалі, што гэта хлусня», — расказаў ён.
Жыгімантас Павіліёніс мяркуе, што Лукашэнка не адправіць сваё войска ва Украіну.
«Таму што гэтага не хоча не толькі народ, але і большасць беларускіх вайскоўцаў, яны не хочуць памерці. Беларускае войска ніколі не было моцным, Лукашэнка заўсёды інвеставаў у КДБ і ва ўнутраныя войскі.
Калі ён рызыкне гэта зрабіць, то мы закрыем самыя апошнія клапаны рэжыму, але не народу. Калі ён уступіць у вайну — гэта будзе апошні ўбіты цвік у яго труну. Мы, як і ўкраінцы, да ўсіх сцэнароў рыхтуемся. Бачым рухі Лукашэнкі і Пуціна, але разумеем, што беларускі народ супраць вайны.
Гэтага злачынства ні мы, ні Еўропа, ні ўвесь цывілізаваны свет не даруе ніколі. Усе, хто ў гэтым удзельнічае, будуць персанальна пакараныя. А тыя, хто змагаецца супраць, заваююць сваё месца ў Еўропе. Беларусы павінны падняцца і заваяваць сваё месца ў Еўропе барацьбой супраць гэтага генацыднага рэжыму», — падсумоўвае ён.
Чытайце таксама:
«Трэба адмаўляцца ад таго, што 2,5 года не працуе». Прадстаўніца Кабінета па сацыяльных пытаннях Вольга Гарбунова расказала, чым зоймецца на гэтай пасадзе
Хто плаціць за міжнародныя візіты Ціханоўскай і ці ўсюды за ёй ходзяць беларускія спецслужбы?
Ці вінаватая Ціханоўская ў тым, што Лукашэнка не выпускае палітвязняў?
Народ Беларусі за санкцыі і гатовы пацярпець дзеля перамогі.
Людзей катуюць у турмах а яны хлусяць пра "народ"!