Лукашэнка заявіў, што Беларусь адродзіцца «як фенікс з попелу»
На сустрэчы з губернатарам Пензенскай вобласці Расіі Алегам Мельнічэнкам ён прызнаў, што Беларусь аказалася ў складанай сітуацыі з-за уведзеных заходнімі краінамі санкцый.
«Час складаны. Але час велізарных магчымасцяў. Напэўна, нам трэба было перажыць гэты перыяд, каб зразумець не толькі, у які час мы жывем, але і як нам развівацца далей. Думаю, што апошнія некалькі месяцаў, можа быць, год-паўтара сур'ёзна нас працверазілі. Мы зразумелі, што выратаваць, абараніць сябе мы можам толькі самі.
Нікому мы не патрэбныя. Мы зразумелі гэта раней. Цяпер Расія гэта ўсвядоміла, напэўна, як ніколі. І мы гатовыя не упусціць гэты час магчымасцяў. Пры ўсіх складанасцях, якім мы сёння падвяргаемся.
Лукашэнка дадаў, што эканамічныя і фінансавыя санкцыі «наваліліся» больш на Расію, чым на Беларусь.
«Вось такія яны (заходнія краіны) партнёры. Але ніхто ў гэтым сёння не сумняваецца, што мы не проста выстаім, а адродзімся, як фенікс з попелу. Нам у гісторыі не аднойчы даводзілася гэта рабіць. Не хацелася б. Але нас паставілі ў такія ўмовы», — сказаў ён.
