Цэлы люты на вялікім экране будуць паказваць фільмы Ларса фон Трыера. Пасля паказу іх можна абмеркаваць з кінаэкспертам

Скандальны дацкі рэжысёр, цынік, правакатар, адзін са стваральнікаў кірунку кіно «Догма 95», колішняя персона нон грата на Канскім кінафестывалі — Трыер са сваёй пладавітай фільмаграфіяй і хуліганскімі выхадкамі з’яўляецца адным з найвядомейшых рэжысёраў не толькі ў Даніі, але і ў свеце. Па пятніцах і суботах лютага ў мінскім кінатэатры «Піянер» будуць праходзіць «Уікэнды з Ларсам фон Трыерам», на якіх пакажуць восем карцін аўтара і абмяркуюць іх з кінаэкспертам Ігарам Сукманавым.

Першы сеанс адбудзецца ўжо 5 лютага. Падчас «Уікэндаў» будуць паказаныя фільмы, што прынеслі рэжысёру славу ў пачатку кар’еры, уладальнікі прэстыжных узнагарод і стужкі, прэм’еры якіх шакавалі публіку і выклікалі грамадскі рэзананс.

У падборцы няма знакамітых карцін 2010-х кшталту «Антыхрыста» ці «Німфаманкі»: яна прапануе прасачыць за менш вядомай сучаснаму гледачу часткай фільмаграфіі Трыера. Ва «Уікэнды» ўключаны работы «Элемент злачынства» і «Эпідэмія», «Еўропа» і «Мандэрлей», а таксама гучныя «Тая, што танцуе ў цемры» і «Рассякаючы хвалі».

Паказ кожнай з васьмі карцін будзе працягвацца абмеркаваннем убачанага з кінакрытыкам, кінаэкспертам і праграмным дырэктарам кінафестывалю «Лістапад» Ігарам Сукманавым.

Уласна кампанія «Арт Карпарэйшн», што з’яўляецца арганізатарам «Лістапада» і называе сябе гідам па добрым кіно, выступае арганізатарам і «Уікэндаў з Ларсам фон Трыерам». Апошні паказ серыі пройдзе 27 лютага.