Здарэнне адбылося вечарам 24 чэрвеня ў Гомелі. 41-гадовы мужчына з жонкай павінны былі з'ехаць дадому, таму выклікалі таксі, паведамляе МУС.
У машыне мужчына заснуў, а ў гэты час яго жонка папрасіла кіроўцу заехаць у краму купіць корм для жывёл. Таксіст адмовіў, спаслаўшыся, што ў замове пазначаны канкрэтны маршрут, ад якога адхіляцца нельга.
Тут муж прачнуўся, не разбіраючыся ў сітуацыі, пачаў абурацца. У выніку пара вырашыла ануляваць паездку. Выходзячы з салона, пасажыры працягвалі скандаліць. Пры гэтым мужчына, зачыняючы дзверы, прышчаміў сабе палец. Гэта раззлавала яго яшчэ больш, таму ён накінуўся на таксіста — стаў душыць яго і пагражаць расправай.
У міліцыю пра сітуацыю паведамілі мінакі. Мужа і жонку даставілі ў райаддзел і склалі пратаколы за дробнае хуліганства. Акрамя таго, дзеянні гамяльчаніна следчыя кваліфікавалі як пагрозу забойствам і распачалі крымінальную справу. Падазраванага адправілі ў ізалятар.
Мужчына ўжо прыцягваўся да крымінальнай адказнасці за хуліганства. Ён таксама праходзіць па яшчэ адной крымінальнай справе як падазраваны ў крадзяжы.