Эдуард Арэшка раней быў антыкрызісным кіраўніком Клімавіцкага лікёра-гарэлачнага завода, а таксама кіраўніком «Магілёўаблхарчпрама», піша Mogilev Online.
Арэшка стане чацвёртым гендырэктарам малочнага гіганта за 6 гадоў. «Бабушкина крынка» — самы буйны гулец на малочным рынку Магілёўшчыны. Паводле нацыянальнага агенцтва Беларусі, займае 9 месца ў топ-100 адкрытых акцыянерных таварыстваў краіны.
Мінулага дырэктара прадпрыемства Генадзя Скітава затрымалі па гучнай «малочнай справе» за атрыманне хабару ў асабліва буйным памеры.
14 лістапада намеснік начальніка следчага ўпраўлення Камітэта дзяржаўнай бяспекі Канстанцін Бычак заявіў, што фігурантамі «малочнай» справы сталі 26 чалавек, з іх 15 утрымліваюцца пад вартай.
Арыштаваны Генадзь Скітаў, як сцвярджае КДБ, арганізаваў «сумнеўныя схемы рэалізацыі прадукцыі ААТ «Бабушкина крынка». Ён сфармаваў каманду менеджараў з ліку сваякоў і былых падначаленых, увёў новую збытавую палітыку і «замкнуў фінансавыя патокі на сябе».
Лукашэнка заявіў, што «шляхам подкупу асобныя камерсанты атрымлівалі права першачарговага размеркавання малочнай прадукцыі (масла, сыроў, іншай малочнай прадукцыі) на сваю карысць з магчымасцю закупкі па цане ніжэйшай за ўстаноўлены індыкатыў».
Чытайце таксама:
Чым адметная «Бабушкина крынка», кіраўніка якой затрымалі за карупцыю
