«У многіх беларускіх дзетак хтосьці з бацькоў (а часам і абое) у гэты час знаходзіцца за кратамі па палітычных матывах. Многія сем'і вымушаныя будуць сустракаць навагоднія святы ў чужой краіне, у расстанні, не маючы магчымасці зрабіць традыцыйныя падарункі родным. Разам з вамі мы можам зрабіць так, каб палітзняволеныя бацькі падарылі сваім дзецям крыху радасці ў гэтыя дні», — распавядае пра збор «Байсол». У рамках акцыі Фонд плануе сабраць 20 000 еўра — па 100 еўра на падарунак для кожнага дзіцяці.
Да ўдзелу ў аўкцыёне далучыўся Ігар Случак, які раней разам з сям'ёй эвакуіраваўся з Беларусі пры дапамозе «Байсол». Мужчына выставіў на таргі блок рэдкай маркі са сваёй асабістай калекцыі — з карцінай «Ева» мастака Хаіма Суціна. Выява дзяўчыны ў чорным стала адным з сімвалаў пратэстаў 2020 года.
Фота: сацсеткі ўдзельніка аўкцыёна
На старце аўкцыёну кошт марак, выпушчаных Белпоштай ў 2015-м, складаў 100 еўра. За некалькі дзён сума вырасла да 230. У дадатак да асноўнага лота пераможца атрымае прыемныя бонусы. «Разам з Евай будуць яшчэ невялікія падарункі, але мы не скажам якія, каб калядная неспадзяванка была і для пераможца ауцыёну», — напісаў на сваёй старонцы Ігар Случак.
Мастачка Вольга Якубоўская, вядомая карцінамі з коцікамі, напярэдадні сваёй выставы «Жаночы Марш» у Фларэнцыі разыграла на дабрачынным аўкцыёне работу «Festa della Repubblica».
Фота: сацсеткі мастачкі
За лот вялася барацьба. Пачатковы кошт карціны склаў 100 еўра, але ў канцы таргоў лот быў прададзены за 1000 еўра.
Адна з мастачак ахвяравала гербарый з кветак, перавезеных з Беларусі. «Гэтыя кветкі збіраліся і сушыліся ў Беларусі ў 2021 годзе і разам з іншымі нешматлікімі рэчамі выехалі ў эміграцыю ў тым жа годзе напрыканцы лета. То няхай гэтая карціна камусьці прынясе часцінку роднага краю і паспрыяе добрай справе», — распавядае пра свой лот жанчына.
Фота: сацсеткі мастачкі
Самая высокая стаўка за кампазіцыю з кветак склала 250 еўра.
Акрамя аўкцыёну ў межах акцыі адбываюцца і іншыя цікавыя актыўнасці. У аўторак, 28 лістапада, беларускі дабрачынны музычны рух Belarus Outside Sound System і інтэрнэт-тэлеканал UKRAіNATV пры падтрымцы праекта рэзідэнцый і культурнага абмену PerspAKTIV прадстаўляюць 5-гадзінны стрым салідарнасці з удзелам чатырох беларускіх дыджэяў і электроншчыкаў.
Фота: сацсеткі ўдзельнікаў аукцыёну
«Кракаўскія электроншчыкі з Беларусі прадставяць свае часовыя сэты. Падчас стрыму мы будзем збіраць грошы на «Калядны цуд» — падарункі дзеткам, у якіх хтосьці з бацькоў у гэтую гадзіну знаходзіцца за кратамі па палітычных матывах», — пішуць музыкі ў сацыяльных сетках.
У межах каляднай акцыі «Падорым дзецям цуд!» ужо сабрана больш за 14 тысяч еўра. Заяўкі на дапамогу падалі звыш 115 сем'яў палітвязняў. Унесці свой уклад і далучыцца да збору можна па гэтай спасылцы.
