Кракадзіл. Фота: pixabay
Паводле слоў Коліна Дэвера, якія прыводзіць Бі-бі-сі, інцыдэнт з кракадзілам здарыўся месяц таму каля возера Фініс, што на поўначы Аўстраліі, куды фермер прыехаў рамантаваць агароджу.
Ідучы каля возера, Колін заглядзеўся на рыб, якія плылі воддаль, і яго за нагу цапнуў трохметровы кракадзіл.
Фермер стаў біць кракадзіла другой нагой, але марна: жывёла пацягнула мужчыну пад ваду.
«Я тоўк кракадзіла, але той пацягнуў мяне ў ваду. Я быў у жаху і неяк укусіў яго за вока. І рэптылія мяне выпусціла!» — расказаў Колін Дэвера.
Мужчына здолеў дабрацца да машыны і перавязаць сабе нагу.
Потым брат Коліна адвёз яго ў шпіталь, які знаходзіцца за 130 кіламетраў ад месца здарэння. Фермер правёў месяц на бальнічным ложку.
«Калі б кракадзіл схапіў мяне за іншае месца, то ўсё магло быць нашмат горш. Гэты выпадак прымусіў мяне падумаць аб змене роду дзейнасці, каб больш не рамантаваць агароджы ў небяспечных багністых месцах», — адзначыў Колін.
Нагадаем, што гэта не першы выпадак незвычайнай перамогі чалавека над кракадзілам у Аўстраліі. У 2021 годзе 60-гадовага аўстралійца таксама зацягнула пад ваду рэптылія, але мужчына выхапіў кішэнны сцізорык і ўсадзіў яго ў галаву жывёле. Так ён выратаваў сабе жыццё.
Чытайце таксама:
У Філадэльфіі мужчына спрабаваў трапіць на бейсбольны матч разам са сваім алігатарам
Мэр мексіканскага горада абраў сабе вельмі незвычайную жонку. Вяселле прайшло без інцыдэнтаў