Актывістцы Свабоднага прафсаюза металістаў далі 1,5 года калоніі
У судзе Маскоўскага раёна Мінска вынеслі прысуд палітзняволенай актывістцы Свабоднага прафсаюза металістаў Яніне Малаш. Яе абвінавацілі паводле ч. 1 арт. 342 КК (актыўны ўдзел у дзеяннях, якія груба парушаюць грамадскі парадак) і прысудзілі адзін год і шэсць месяцаў калоніі. Пад вартай актывістка знаходзіцца ўжо сем месяцаў, піша «Вясна».
Раней Яніна працавала на Мінскім электратэхнічным заводзе імя Казлова зборшчыцай дэталяў для электратрансфарматараў, адкуль яе звольнілі па палітычных прычынах у лістападзе 2020 года. Да затрымання яна была сяброўкай незалежнага прафсаюза.
Крымінальную справу супраць Малаш пачалі разглядаць 14 лістапада, а ўжо на наступны дзень суддзя Сяргей Кацар вынес ёй прысуд. На волі Яніну чакае дачка.
Nashaniva.com
Хочаш падзяліцца важнай інфармацыяй ананімна і канфідэнцыйна?
Пішыце рэдактару «Нашай Нівы» ў ТГ
